Զոհված հերոսի ընտանիքն այսօր փողոցում հայտնվելու վտանգի առաջ է․ գործակալները գերադասում են ռուս զբոսաշրջիկներին

Թվում էր, թե ՀՀ-ում վարձակալվող բնակարանների գները պետք է լինեին նախկինը, կամ, գոնե, պահպանեին գները, երբ Հայաստանում դեռ այսքան շատ չէին ռուս և ուկրաինացի զբոսաշրջիկները։ Անշարժ գույքի գործակալները հասարակության կողմից քննադատվելուց հետո էլ պահպանեցին նույն գործելաոճը՝ մեկ տարբերությամբ․ տներից դուրս են հրավիրում անգամ զոհված հերոսների ընտանիքներին՝ օտարերկրացիների գլխի վերևում տանիք ապահովելու, ինչպես նաև իրենց իսկ գրպանները լցնելու համար: Հատկանշական է, որ գործակալները զգուշավոր են․ չեն նշում, որ նոր վարձակալները ՀՀ ժամանած զբոսաշրջիկներ են, ըստ ամենայնի, ենթադրում են, որ հակառակ դեպքում, հայրենակիցների մոտ դժգոհության ալիք կբարձրացնեն։

ԼՈՒՐԵՐ.com -ին ահազանգած քաղաքացին նշեց, որ այդ ամենի միջով ստիպված անցնում են նաև իրենք՝ անգամ հայրենիքին ամենաթանկը տալուց հետո:

«Տան տերը ասաց, որ բնակարանը 70 հազարից դարձնում է 120 հազար դրամ՝ քաջ գիտակցելով, որ այդքան գումար չենք կարողանա վճարել, ասաց՝ եթե ցանկանում ենք՝ մնանք, ապրենք, եթե ոչ՝ լքենք տունը»,-նշեց զոհված հերոսի բարեկամը՝ հավելելով, որ անհարմար է զգում այս թեմայով որևէ բան խոսել:

ԼՈՒՐԵՐ.com -ի հետ զրուցեց նաև մեկ այլ քաղաքացի՝ Հասմիկ Վարդանյանը, որը նշեց՝ 2,5 տարի է՝ ապրում են վարձով, երիտասարդ ընտանիք են և ունեն 1,6 տարեկան երեխա, և ինչ-որ պահի տան տերը որոշել է, որ պետք է բարձրացնի տան վարձավճարը.

«Ամսավարձը 100.000 դրամ էր։ Վճարը տվել ենք առանց ուշացնելու, ամբողջական, ամեն ամիս նույն օրը։ Մարտի 8-ին տանտերը զանգահարեց և ասաց, որ մայիսի 1-ից վարձը սարքում են 150.000 դրամ»,- ասաց նա՝ հավելելով, որ տանտերը պատճառաբանել է՝ վաղուցվանից էին ուզում բարձրացնել, պարզապես, ձգձգում էին:

Հետաքրքրվեցինք՝ արդյոք ազատելու են բնակարանը, թե կընդունեն տան տիրոջ նոր պահանջը. «Ճիշտն ասած՝ մենք մեծ ցանկություն ունենք հիփոթեքով տուն վերցնել, հիմա այդ հարցերով ենք զբաղվում, եթե մինչև մայիսի 1-ը ստացվի, շատ լավ կլինի, եթե ոչ՝ պիտի խոսենք գոնե 120.000-ով մնանք այս տանը: Եթե համաձայնեն՝ կմնանք, եթե չէ՝ հաստատ դուրս կգանք, մենք, նախ, ֆինանսապես չենք կարող 150 տալ, բացի դա, այդ տունը 150.000-ի տուն չէ»,- ասաց մեր զրուցակիցը:

Զրուցեցինք նաև Մարիան Ավետիսյանի հետ, որը կանգնած է անչափահաս երեխայի հետ դրսում հայտնվելու վտանգի առաջ. «Վարձով տուն արդեն քանի ամիս է՝ չեմ կարողանում գտնել: Տան տերը դեկտեմբերից հանել է վաճառքի և այդ ամսից մինչև առ այսօր չեմ կարողանում 80.000 դրամով նորմալ վիճակում դատարկ տուն գտնել, գումարած այս ամենին, ավելացել է նաև ռուսների խնդիրը, ինչի պատճառով վարձով տները էլ ավելի են թանկացել»,- ընդգծեց նա՝ հավելելով․ «Այն տանը, որտեղ հիմա ապրում եմ, սկզբից վարձել էի 60.000 դրամով, հետո գինը բարձրացրին, սարքեցին 70.000, հիմա պատրաստ եմ այդտեղ մնալ թեկուզ 80.000 դրամով»,- ասաց նա՝ ցավով նշելով, որ որևէ պայմանագիր չունի կնքած տան տիրոջ հետ։

«Այսօր Հայաստանում կան շատ ռուս և ուկրաինացի զբոսաշրջիկներ, որոնց հաշվին մեր հայրենակիցները կարողանում են «հարստանալ», բայց վաղը իրենք այստեղ չեն լինի, ի՞նչ են անելու տան տերերը, մեզ խնդրելու են, որ հե՞տ գնանք, ապրենք իրենց տներո՞ւմ»,-այս միտքն է սփոփում փողոցում հայտնվելու վտանգի առջև կանգնած մեր հայրենակիցներին։

Զվարթ Պետրոսյան