Դաշինքն Ուկրաինայում ոչ թռիչքային գոտի չի ստեղծի․ ՆԱՏՕ-ի երկրներ

ՆԱՏՕ-ի երկրները միասնական են այն դիրքորոշման մեջ, որ դաշինքը Ուկրաինայում ոչ թռիչքային գոտի չի ստեղծի՝ չնայած այդ մասին Ուկրաինայի նախագահ Վլադիմիր Զելենսկու բազմաթիվ կոչերին։

«Ուկրաինայում օդային կամ ցամաքային ուժերի տեղակայում չի լինի, եւ դա մեր դաշնակիցների միասնական դիրքորոշումն է»,- Բրյուսելում կայացած մամուլի ասուլիսում ասել է ՆԱՏՕ-ի ղեկավար Յենս Սթոլթենբերգը։

Նրա խոսքով, նախարարները քննարկել են այդ հարցը, եւ դաշինքը հաստատակամ է Ռուսաստանի հետ պատերազմը չսրելու հարցում։ «Իրավիճակը կարող է վատթարանալ, եթե ՆԱՏՕ-ն այնպիսի գործողություններ ձեռնարկի, որոնք այն փաստացի կվերածեն ՆԱՏՕ-ի եւ Ռուսաստանի միջեւ լիարժեք պատերազմի»,- ասել է նա։

Սթոլթենբերգը հայտարարել է, որ պաշտպանական գերատեսչությունների գլխավոր հրամանատարները պայմանավորվել են «շարունակել զգալի աջակցություն ցուցաբերել Ուկրաինային, այդ թվում՝ ռազմական մատակարարումներով, ֆինանսական եւ հումանիտար օգնությամբ»։

Նրա խոսքով, դաշինքի անդամի նկատմամբ ագրեսիայի ցանկացած գործողություն անթույլատրելի է։ «Մոսկվան չպետք է որեւէ կասկած ունենա այն հարցում, որ ՆԱՏՕ-ն չի հանդուրժի դաշնակիցների ինքնիշխանության կամ տարածքային ամբողջականության դեմ որեւէ ոտնձգություն»:

Սթոլթենբերգն ասել է, որ դաշինքի համար պաշտպանական պլաններն արդեն ակտիվացել են։ «Մենք մեր անվտանգության հարցում նոր իրականության ենք բախվում։ Հետեւաբար, պետք է երկարաժամկետ հեռանկարում վերսկսենք մեր հավաքական պաշտպանությունն ու զսպումը»,- ասել է նա։

ՆԱՏՕ-ի ղեկավարը նշել է, որ ռազմական ղեկավարներին հանձնարարվել է ամրապնդել պաշտպանությունը ցամաքում, օդում եւ ծովում, կիբեռտարածությունում եւ նույնիսկ տիեզերքում: Սթոլթենբերգն ասել է, որ դաշինքի արեւելյան հատվածում ցամաքում զգալիորեն ավելի շատ ուժեր պետք է լինեն։