Հանրահավաքի մասնակիցները բացեցին Ֆրանսիայի հրապարակի մուտքերը. ակցիան ավարտվեց

«Պաշտպանելով Արցախը` պաշտպանենք Հայաստանը» խորագրով հրապարակում ԱԺ «Հայաստան» և «Պատիվ ունեմ» խմբակցությունների կազմակերպած հանրահավաքի մասնակիցները բացեցին Երևանի Ֆրանսիայի հրապարակի մուտքերը, որոնք փակել էին ակցիայի շրջանակում, և ակցիան ավարտվեց։

Ֆրանսիայի հրապարակում, ինչպես և դրանից առաջ Ազատության հրապարակում տեղի ունեցած հանրահավաքի ժամանակ հնչեցվեցին «Առանց Նիկոլ Հայաստան», «Նիկոլ դավաճան», «Հայաստան ոտքի», «Արցախ ոտքի» վանկարկումներ։

Ֆրանսիայի հրապարակում կարճ ելույթով հանդես եկավ ԱԺ փոխնախագահ Իշխան Սաղաթելյանը, որն ասաց, որ չորս տարի առաջ այս օրերին այս հրապարակից սկսվեց Հայաստանի պետականության կործանման ընթացք։

«Ամենևին պատահական չէ, որ մենք մեր պայքարի սկիզբն սկսում ենք այս հրապարակից ու այս հրապարակում բարձրացնում Արցախի Հանրապետության դրոշը»,– հայտարարեց նա՝ նշելով, որ ՀՀ իշխանությունները չունեն մանդատ երկիրը նոր զիջումների տանելու։

Իշխան Սաղաթելյանը հավաքվածներին առաջարկեց, որ վաղվանից Հայաստանի բոլոր քաղաքների հրապարկներում բարձրացվի Արցախի դրոշը։

«Սա սկիզբն է մեր պայքարի, և այն լինելու է շարունակական։ Այս պայքարը կանգ չի առնելու մինչև իր վերջնական հաղթանակ»,– հայտարարեց ԱԺ փոխնախագահը՝ նշելով, որ այսօրվա ակցիան սրանով ավարտվում է, իսկ պայքարը՝ ոչ։

Հիշեցնենք, որ ըստ հանրահավաքի կազմակերպիչների՝ հանրահավաքի նպատակն է հանրությանն իրազեկել Արցախին և Հայաստանի սպառնացող վտանգների մասին։