Մոսկվայում տեղի կունենա «Հայաստան և Ռուսաստան. դաշնակցային փոխգործակցության 30 տարի» քաղաքագիտական կլոր սեղանը

Հասարակություն 7 Ապրիլ, 2022 20:42

2022 թ. ապրիլի 8-ին Միջազգային գործերի ռուսաստանյան խորհուրդը (РСМД) և ԴԻԱԼՈԳ կազմակերպությունը Մոսկվայում անց են կացնելու «Հայաստան և Ռուսաստան. դաշնակցային փոխգործակցության 30 տարի» քաղաքագիտական կլոր սեղանը: Միջոցառումը տեղի է ունենալու «Լորիս-Մելիքով» բանավեճի ֆորումի շրջանակներում և նվիրվելու է Հայաստանի և Ռուսաստանի միջև դիվանագիտական հարաբերությունների հաստատման 30-ամյակին:

Կլոր սեղանի աշխատանքը սկսվելու է նրա կազմակերպիչներին և մասնակիցներին ՌԴ արտաքին գործերի նախարար Սերգեյ Լավրովի և ՀՀ արտաքին գործերի նախարար Արարատ Միրզոյանի հղած ուղերձների հրապարակմամբ:

Միջոցառմանը մասնակցելու են Հայաստանի և Ռուսաստանի առաջատար գիտա-կրթական և հետազոտական հաստատությունների վերլուծաբաններ, տնտեսության իրական հատվածի և Մոսկվայի հայկական կազմակերպությունների ներկայացուցիչներ: Հայ և ռուսաստանյան քաղաքագետները, գործարարները և հասարակական գործիչներ երեք նստաշրջաններում կքննարկեն Հարավային Կովկասում և նրա շուրջ ստեղծված իրավիճակը 2020 թ. նոյեմբերի 10-ից հետո, հայ-ռուսական ռազմավարական գործընկերությունը համաշխարհային և տարածաշրջանային նոր իրավիճակում, ինչպես նաև Հայաստանի և Ռուսաստանի միջև տնտեսական համագործակցության ներուժը ԵԱՏՄ շրջանակներում:

Նշենք, որ սա Միջազգային գործերի ռուսաստանյան խորհրդի և ԴԻԱԼՈԳ կազմակերպության հերթական համատեղ միջոցառումն է: Փոխադարձ հետաքրքրություն ներկայացնող թեմաների շուրջ համագործակցող կազմակերպությունները այս տարվա ապրիլի 1-ին իրենց գործընկերությունը ամրագրել են համաձայնագրով, որը ստորագրել են ԴԻԱԼՈԳ կազմակերպության նախագահ Յուրի Նավոյանը և Միջազգային գործերի ռուսաստանյան խորհրդի գործադիր տնօրեն Անդրեյ Կորտունովը: