ԱՄՆ-ն բոլոր երկրներին կոչ է անում Ռուսաստանից զենք չգնել․ Բլինկեն

ԱՄՆ-ն բոլոր երկրներին կոչ է անում զենք չգնել Ռուսաստանից, մինչդեռ ռուսական С-400 համակարգերի գնման համար Հնդկաստանի դեմ հնարավոր պատժամիջոցների մասին որոշում դեռ չի կայացվել։ Այս մասին երկուշաբթի օրը հայտարարել է ԱՄՆ պետքարտուղար Էնթոնի Բլինկենը «2+2» ձևաչափով ԱՄՆ-ի և Հնդկաստանի պաշտպանության և արտաքին հարաբերությունների գերատեսչությունների ղեկավարների միջև երկկողմ բանակցություններից հետո Վաշինգտոնում կայացած համատեղ մամուլի ասուլիսում։

«Մենք շարունակում ենք կոչ անել բոլոր երկրներին խուսափել խոշոր նոր գործարքներից՝ ռուսական սպառազինության համակարգեր ձեռք բերելու համար, հատկապես այն լույսի ներքո, թե ինչ է անում Ռուսաստանը Ուկրաինայի հետ կապված»,- ասել է նա։

«Մենք դեռ որոշում չենք կայացրել պոտենցիալ պատժամիջոցների կամ պատժամիջոցներից պոտենցիալ բացառությունների վերաբերյալ»,- հավելել է ԱՄՆ դիվանագիտության ղեկավարը՝ պատասխանելով S-400-ի գնման պատճառով Հնդկաստանի դեմ հնարավոր պատժամիջոցների մասին հարցին։

Բլինկենը խոստովանել է, որ «Հնդկաստանի և Ռուսաստանի միջև հարաբերությունների երկար պատմություն կա, այդ թվում՝ ռազմական տեխնիկայի հետ կապված»։ «Այդ հարաբերությունները արմատավորվեցին շատ տարիներ առաջ, երբ, ինչպես ասացի, մենք հնարավորություն չունեինք գործընկեր լինելու Հնդկաստանի համար: Այժմ մենք կարող ենք և պատրաստ ենք լինել այդպիսի անվտանգային գործընկեր Հնդկաստանի համար»,-ասել է նա։ «Սա այն ոլորտներից մեկն է, որը մենք այսօր մանրամասն քննարկել ենք», - հավելել է Բլինկենը։