«Հուսո առագաստ-2022»-ը սկսել է նավարկությունը դեպի բաց ծով

Արդեն տասներեք տարի է Երևանում գործում է Բարդերի ակումբը, որտեղ հեղինակ-կատարողների տարբեր սերունդների ներկայացուցիչները, կամ ինչպես իրենք են իրենց անվանում կիթառով պոետները հանդիսատեսին ներկայանում են իրենց թե՛ նոր, թե՛ արդեն իսկ շատ սիրված երգացանկով։ Ինչպես նշում է փառատոնի հիմնադիր, հեղինակ-կատարող Վախթանգ Հարությունյանը, այս ժանրն աչքի է ընկնում բացառիկ անկեղծությամբ:  

Վերջին տարիներին ակումբի մշտական անդամների ցանկն ակտիվ համալրվում է նորանոր երիտասարդների անուններով։ Դրան մեծապես նպաստում է, արդեն իսկ ավանդական դարձած, ամենամյա «Հուսո առագաստ» հեղինակային երգի միջազգային փառատոնը, որը կազմակերպվում է «Սիվիլ արտ» մշակութային հասարակական կազմակերպության և «Բարդերի ակումբ» ստեղծագործական միավորման հետ համատեղ։

Այս տարի փառատոնը մեկնարկում է 7-րդ անգամ և կայացած իրադարձություն է Հայաստանի մշակութային կյանքում։

Փառատոնը անց է կացվում 2 փուլով՝ նախընտրական և համերգային։

Նախընտրական փուլին մասնակցելու համար պետք է մինչև հունիսի 5-ը լրացնել հայտը, ներկայացնել սեփական հեղինակային երգը և այս տարի նաև նոր՝ կատարող անվանակարգում, արդեն սիրված բարդ ժանրի հեղինակային երգը՝ սեփական մեկնաբանությամբ ու կիթառի սեփական նվագակցությամբ:

Այս տարի ևս մեկ նորամուծություն. հունիսի 10-ին՝ Մետրո թատրոնում, կկայանա նախընտրական փուլի ամփոփիչ համերգ, որի մուտքն ազատ է: Ժյուրիի լսումների արդյունքում կձևավորվի փառատոնի լավագույն տասնյակը, որը կմասնակցի եզրաչակիչ փուլին, որը տեղի կունենա Սևանի «WishUp» լողափում՝ հուլիսի 15-ից 17-ը։ Եռօրյա փառատոնային ծրագրին և համերգաշարերին կմասնակցեն 2022-ի լավագույն տասնյակը, նախորդ տարիների հաղթողները, բոլոր սերունդների ներկայացուցիչներն ու փառատոնի պատվավոր հյուրերը՝ օտարերկրյա հեղինակ-կատարողները։

Իդեպ մասնակիցների եռօրյա կեցության ծախսերը հոգում են փառատոնի կազմակերպիչները: Բնության գրկում ակումբային սիմվոլիկ մոմերին կփոխարինի մեծ խարույկը, որի շուրջ գիշեր ու ցերեկ հնչող հեղինակային-երգը կդառնա յուրօրինակ կամուրջ՝ բոլոր սրտերի համար:

Մեզ հետ զրույցում՝ Հայաստանում այս ժանրի հիմնադիր Ռուբեն Հախվերդյանը, ում երգերի ներքո մի ամբողջ սերունդ է մեծացել, նշեց, որ չի պատկերացնում ո՛չ քաղաքային, ո՛չ գյուղական կյանքն առանց այս ժանրի, որը շատ խոր արմատներ ունի: Ըստ նրա՝ հեղինակային երգը հատուկ ստեղծվել է հենց հայերենով հնչելու համար: Անդրադառնալով երգարվեստի ներկայիս՝ ոչ այնքան մխիթարական վիճակին՝ երգահանը մեջբերեց Մեծն Կոմիտասի խոսքը. «Երգը՝ լեզվամտածողություն է» և հորդորեց շատ զգույշ վերաբերվել դրան:  

Կարևորելով փառատոնի դերը՝ նա ավելացրեց, որ այն ոչ միայն հաջողությամբ սերնդափոխության հարցն է լուծում, այլև հրաշալի հարթակ է հարևան երկրների կյանքին ու մշակույթին ծանոթանալու համար, քանի որ այս ժանրի երգերում, հենց այդ կյանքն է՝ իր բոլոր կողմերով: