«Երրորդ երկրների քաղաքացիները կարող են լինել ադրբեջանցիներ»

Այսօր ՀՀ կառավարության նիստի  ժամանակ ՀՀ վարչապետ Նիկոլ Փաշինյանը նշեց, որ Հայաստանի եւ Թուրքիայի հատուկ ներկայացուցիչները հասել են պայմանավորվածության երկու երկրների միջեւ սահմանը բացել երրորդ երկրների քաղաքացիների համար, նաեւ երկու երկրների միջեւ բեռնափոխադրումներ իրականացնել օդային տրանսպորտով:

«Այդ համաձայնությունը ձեռք է բերվել վերջին հանդիպման ժամանակ, ճիշտ է, մենք մանրամասները չգիտենք, բայց այն, ինչ գիտենք,  կարող ենք գնահատել որպես  փոքր քայլ:  Իհարկե, սա թուրքական կողմի նախաձեռնությունն է, նրանք ցանկանում են  ցույց տալ, որ  բանակցային գործընթացը  դինամիկ շարունակություն ունի»,-ԼՈՒՐԵՐ.com-ի հետ զրույցում նշեց թուրքագետ Ռուբեն Սաֆրաստյանը:

Նրա խոսքով՝  այն առանձնապես օգուտ չի բերի Հայաստանին: Նախ նախապատրաստական աշխատանքների համար ժամանակ կպահանջվի, որովհետև տասնամյակներ շարունակ այդ սահմանը փակ է եղել, մյուս կողմից՝ մեզ համար ազգային անվտանգության պաշտպանության խնդիր կա.

«Երրորդ երկրներ ասվածի մեջ մտնում են բոլոր երկրները, բացի Հայաստանից և Թուրքիայից: Պատկերացրեք Թուրքիայի տարածքով մարդիկ են մտնում Հայաստան՝ երրորդ երկրների քաղաքացիներ, որոնք կարող են լինել նաև Ադրբեջանի քաղաքացիներ: Դրա համար մեր հատուկ ծառայությունները պետք է կարողանան ապահովել մեր երկրի  անվտանգությունը, ամեն ինչ անեն վտանգները չեզոքացնելու համար»:

Թուրքագետի խոսքով՝ Հայաստանն իր գոյության առաջին օրվանից հայտարարում է, որ պատրաստ է Թուրքիայի հետ հարաբերությունները կարգավորել՝ առանց նախապայմանների: Եվ, փաստորեն, հիմա այդ քաղաքականության շարունակությունն է:  Հայաստանի համար կարևոր է Թուրքիայի հետ ունենալ նորմալ դիվանագիտական հարաբերություններ և նորմալ գործող սահման, բայց Թուրքիան դա  չի անում, և այժմ անցել է տակտիկական, փոքր քայլերի:

«Դա իրենց բանակցային մարտավարությունն է:  Նրանց համար կարևորը ժամանակ շահելն է: Դա նրանց պետք է, որ  Հայաստանի վրա ճնշում գործադրեն Ադրբեջանի հետ բանակցություններում: Դա նրանք բացահայտ հայտարարել են իրենց բարձրաստիճան ներկայացուցիչների բերաններով»,-հավելեց Ռ. Սաֆրաստյանը:

Նշենք, որ սա Հայաստան-Թուրքիա հարաբերությունները կարգավորելու ուղղությամբ չորրորդ փորձն  է: