Ուռճացված հաստիքներ՝ հանուն ԽԾԲ-ի. ովքե՞ր են մոռացել 2018-ի խոստումը

Վարչապետ Նիկոլ Փաշինյանի դասընկեր, նրա հարսանիքի քավոր, Փաշինյանի կողմից 2021թ․ ապրիլի 8-ին Տավուշի մարզպետ նշանակված Հայկ Ղալումյանն ունի 2 տեղակալ, օգնական, նրա 2 տեղակալներն ունեն մեկական օգնականներ, մարզպետարանն ունի գլխավոր քարտուղար, գլխավոր քարտուղարի տեղակալ։ Տավուշի մարզպետարանն ունի 6 վարչություն, քարտուղարություն եւ 7 բաժիններ, մոտ 90 աշխատակից։ Մարզպետարանի ենթակայության տակ են միայն մարզի բուժհիմնարկները, բացի՝ մասնավորեցված Դիլիջանի ԲԿ-ից, եւ մարզի հանրակրթական դպրոցները։

 

Արարատի նախկին մարզպետ Գարիկ Սարգսյանն իր բարեկամների պաշտոնների էր նշանակում և չէր էլ հերքում ասելով. «Ես ամենևին չեմ արդարանում, արդարանալու համար կասեի՝ ոչ, իմ բարեկամն ու ազգականը չեն»։ Օրինակ, Գարիկ Սարգսյանը Արարատի մարզպետարանում աշխատանքի էր ընդունել իր զարմիկին՝ Գևորգ Մանուկյանին, ում նշանակել էր իր օգնականի պաշտոնում, իսկ մեկ այլ բարեկամի նշանակել էր իր խորհրդական: Ըստ որոշ աղբյուրների՝ այդ բարեկամը մարզպետի մորաքրոջ հարսն է, ով Արարատի մարզպետարանի գլխավոր քարտուղարի պաշտոնակատարն էր։ Մեկ այլ մորաքրոջ հարսի ևս մարզպետը ցանկանում էր Ավշարի դպրոցում պաշտոնի նշանակել, սակայն դա իրականություն չդարձավ համացանցում բարձրացված աղմուկից հետո: Եթե համեմատենք Սարգսյանի նախորդի հետ, ապա նշենք, որ Արամայիս Գրիգորյանի ղեկավարման տարիներին մամուլում ընդամենը երկու հիշատակում է եղել՝ կապված մարզպետի կողմից այս կամ այն ծանոթի պետական համակարգում աշխատանքի տեղավորելու հետ:

 

Իջևանի համայնքապետ Արթուր Ճաղարյանը համայնքապետարանում աշխատանքի է ընդունել մարզպետ Ղալումյանի բաջանաղի որդուն՝ Վաչե Վիրաբյանին։ Ապա Դավիթ Վիրաբյանի դուստրը՝ 19-ամյա Նանե Վիրաբյանն է հայտնվում ՔՊ ավագանու ցուցակում։ Մարզպետ Հայկ Ղալումյանին կարծես թե չեն բավարարել բաջանաղի ստացած հեղափոխական բոնուսները և արդեն ընտրված քաղաքապետ Արթուր Ճաղարյանին հրահանգել է առանց այդ էլ սուղ բյուջե ունեցող քաղաքում բացել քաղաքապետի տեղակալի երկրորդ հաստիք, որն, ըստ պտտվող լուրերի, նախատեսված է, հենց բաջանաղին փոխքաղաքապետ կարգելու նպատակով։ Հայկ Ղալումյանը քաղաքապետարան է մտցրել նաև իր փեսայի եղբորը։ Բացի այդ՝ համայնքապետ Արթուր Ճաղարյանը Մշակույթի տան տնօրեն է նշանակել Վարդ Շահինյանին, ով համայնքապետի կնոջ մերձավոր ազգականն է:

 

Շիրակի մարզպետ Նազելի Բաղդասարյանը շարունակում է ազգականներին ու բարեկամներին մարզում պաշտոնների նշանակել։ Մասնավորապես Բաղդասարյանի որոշմամբ «Գյումրու Էնրիկո Մատտեի անվան պոլիկլինկայի» տնօրենի թափուր պաշտոնին կառաջադրվի մարզպետի բարեկամուհիներից մեկը։ Խոսքը՝ այս պահին Գյումրու ԲԿ-ում աշխատող բժիշկ Արևիկ Ծառուրյանի մասին է, ով Բաղդասարյանի մորական կողմի բարեկամուհիներից է։ Ավելի վաղ մամուլը գրել էր, որ մարզպետը ավագանու անդամ իր ընկերուհուն որպես խորհրդական է աշխատանքի ընդունել մարզպետարանում։ Դրանից առաջ էլ ավագանու անդամ եղբոր կնոջն էր պաշտոնի նշանակել տվել Գյումրու քաղաքապետարանում։ Ազգուտակին մարզում աշխատանքով ապահովելու Բաղդասարյանի ձգտումներն այսքանով, իհարկե, չեն ավարտվում։ Փոխմարզպետներից Կարեն Մանուկյանն էլ քավոր- սանիկական հարաբերություններ ունի Բաղդասարյանի ընտանիքի հետ։

 

AntiFake.am կայքին դիմած քաղաքացին տեղեկություններ էր փոխանցել Վայոց ձորի մարզպետարանում առկա «ֆեյք» հաստիքների մասին: Քաղաքացու պնդմամբ՝ մարզպետարանում, որը ղեկավարում է Արարատ Գրիգորյանը ստեղծվել են «ֆեյք» հաստիքներ` իշխանական ուժի ներկայացուցիչների մտերիմներին և «հեղափոխության» իրականացման մեջ իրենց «ավանդը» ներդրած անձանց «տեղավորելու» համար։«Խոսքը մասնավորապես վերաբերվում է ներկայումս մարզպետարանում աշխատող «ՔՊ»-ական Նարեկ Մարտիրոսյանին, ով անցյալ տարի է իր մտերիմ ընկերոջ կապերի շնորհիվ ընդունվել համալսարան՝ ՀՊՏՀ Եղեգնաձորի մասնաճյուղ, և Անի Մխիթարյանին, որը շաբաթվա միայն 3 օրն է ներկայանում աշխատանքի (0.7 դրույք), սակայն դրա դիմաց ստանում է 220.000 դրամ աշխատավարձ և պարգևավճարներ։ Նույնքան էլ ստանում է Նարեկ Մարտիրոսյանը»,- լրատվամիջոցին տեղեկացրել է քաղաքացին։

 

Ինչպես տեսնում ենք՝ 2018-ին Փաշինյանի հրապարակավ տված խոստումը արհամարհվում է հենց իր իսկ յուրայինների կողմից, հեղափոխությունից հետո հատկապես մարզերում ՝ մարզպետարաններում և քաղաքապետարաններում ՔՊ-ական ղեկավարների կողմից  արհեստական ուռճացված պետական ապարատը էլ ավելի ուռճացվեց, իսկ եթե օպտիմալացում նույնիսկ եղել է, ապա այն ակնհայտորեն վերաբերվել է երկար տարիներ՝ նախկին իշխանությունների օրոք աշխատանքի անցածներին և այն աշխատակիցներին, ովքեր չեն կիսում հեղափոխական իշխանությունների քաղաքական հայացքները...։