Բադասյանը Ավանեսյանի դեմ «հանցագործության» մասին հաղորդո՞ւմ է ներկայացնում
Վերլուծական
Օրերս տեղեկություն տարածվեց, որ ՊԵԿ-ը բացահայտել է Հայաստանում չգրանցված դեղերի վաճառքի դեպքեր: Այս մասին հայտնում է ՊԵԿ-ը։ Մասնավորապես, սույն թվականի մայիս-հունիս ամիսներին ՊԵԿ հետաքննության և օպերատիվ հետախուզության վարչության աշխատակիցները ձեռնարկել են օպերատիվ-հետախուզական միջոցառումներ, որի արդյունքում բացահայտվել և կանխվել են Հայաստանի տարածքում տարբեր դեղատների միջոցով իրականացվող չգրանցված դեղերի մանրածախ վաճառքի դեպքեր։ Ըստ էության, սա նշանակում է, որ մի կողմից մաքսայիններն են «քնել» և թույլ տվել, որպեսզի չգրանցված դեղերի խմբաքանակ մուտք գործի Հայաստան, մյուս կողմից ակնհայտորեն թերացել է առողջապահական և աշխատանքի տեսչական մարմինը, որը և պետք է վերհաներ արդեն իսկ շուկա մտած չգրանցված դեղերը և դադարեցներ դրանց շրջանառությունը։
Սակայն, մեղավոր է նաև առողջապահության նախարարությունը և ահա թե ինչու։ Գաղտնիք չէ, որ Դեղերի մասին օրենքում փոփոխություն է կատարվել, որի նպատակն էր դրսից դեղեր ձեռք բերելու ցանկություն ունեցող քաղաքացիների հոգսը թեթևացնելը։ Դեղերի որակի համար, սակայն, ոչ ոք պատասխանատու չէր և չէ։ Նախկինում քաղաքացիները պետք է նախապես դիմեին առողջապահության նախարարություն` նշելով դեղերի անունները, ներկայացնելով անձը հաստատող փաստաթուղթ և բժշկի կողմից հիմնավորում, որ այդ դեղերն անհրաժեշտ են։ Նախարարության թույլտվության հիման վրա միայն կարող էին ներմուծում իրականացնել։ Այժմ նախարարությունը այդ հոգսը իր վրայից թոթափել է, սակայն, ո՞վ էր ասում, որ քաղաքացիների՝ իրենց համար պատվիրված դեղամիջոցները չեն հայտնվի այս կամ այն դեղատանը:
Շաբաթներ առաջ ԱԺ առողջապահության հարցերի մշտական հանձնաժողովում տեղի ունեցավ աշխատանքային քննարկում` «ՀՀ-ում դեղերի շուկայում առկա խնդիրները» թեմայով: Ոլորտի ներկայացուցիչները, մասնավորապես, մտահոգություն հայտնեցին «Դեղերի մասին» օրենքում դեղորայքի զուգահեռ ներմուծմանը վերաբերող դրույթի վերաբերյալ: Պարզվում է` զուգահեռ ներմուծումը սահմանվել է դեղերի գնիջեցման նպատակով, որը գործնականում չի կիրառվում: Ավելին` զուգահեռ ներմուծման անվան տակ շուկայում հայտնվում են անորակ դեղամիջոցներ` հաճախ նաև սպառնալով ազգային անվտանգությանը: Թե ինչով է սա պայմանավորված, ոլորտի ներկայացուցիչները կարծիք հայտնեցին, որ զուգահեռ ներկրողները հետապնդում են գերշահույթ ստանալու նպատակ: Իսկ ո՞վ է աչք փակում այդ ամենի վրա. թերևս, առողջապահության նախարարը։
Ըստ էության, ՊԵԿ-ի կողմից նման հայտարարության տարածումը ոչ այլ ինչ է, քան հանցագործության մասին հաղորդում, իհարկե ոչ ուղղակի իմաստով: Բանն այն է, որ վերը նշված իրավիճակը դեղերի շուկայում չէր ստեղծվի, եթե նախարարությունը և տեսչական մարմինը չթերանային իրենց աշխատանքում և հատկապես՝ չստեղծեին այնպիսի օրենսդրական բացեր, որոնցից կարող են օգտվել Հայաստան ապօրինի դեղ ներմուծել ցանկացողները: Արդյունքում՝ վտանգի տակ է հայտնվել ՀՀ քաղաքացիների կյանքն ու առողջությունը, իսկ պատասխանատուներ ինչպես չկային, այնպես էլ՝ չկան:
ՈՒՂԻՂ ԵԹԵՐ
Ամենադիտված 
Ցմահ դատապարտյալ Արթուր Քոչարյանն ազատ է արձակվել
