Կոռուպցիոն ռիսկերը՝ Նոր Հայաստանի հիմնադրամներում. ովքե՞ր են «աչքի ընկել»

Վերլուծական 26 Հուլիս, 2022 20:36

Ընդդիմադիր Նիկոլ Փաշինյանը հաճախ էր նախկին իշխանություններին մեղադրում պետական հիմնադրամների հանդեպ անուշադրության մեջ, իսկ բուն հիմնադրամներին թիրախավորում էր կոռուպցիոն ռիսկերի, պետական բյուջեի փողերը մսխելու և հանրության առաջ հաշվետու չլինելու պրիզմայով: Ի՞նչ է փոխվել այս առումով Նոր Հայաստանում: Թերևս միայն հիմնադրամների ղեկավար կազմը, ովքեր այսօր, որպես կանոն, ներկայացնում են իշխող քաղաքական թիմը: Մնացած առումով փոփոխությունները տեսանելի չեն, քանի որ գործող հիմնադրամները ինչպես գտնվում էին մութ պատմությունների մեջ, այնպես էլ շարունակում են դրանցում հայտնվելու ավանդույթը:

Դիցուք՝ տարեկան մուտքերի ընդհանուր գումարը և ստացման աղբյուրը իրականացված է գրեթե բոլոր ՀԿ-ների հաշվետվություններում, սակայն վարչապետ Փաշինյանի ընտանիքին պատկանող և Մխիթար Հայրապետյանի կողմից ղեկավարվող «Իմ քայլը» հիմնադրամի 2019թ․ ներկայացրած հաշվետվության մեջ բացակայում է դրամական մուտքերի չափերը, միայն ընգծված է, որ ծրագրի համար ընդհանուր առմամբ ինչքան գումար է տրամադրվել: Իրականացրած ծրագրերի արդյունքների վերաբերյալ հաշվետվություն «Իմ քայլը» հիմնադրամը նույնպես չի ներկայացրել։ «Իմ քայլը» հիմնադրամի 2019թ․-ի հաշվետվության մեջ բացակայում է գործադիր տնօրենի և գլխավոր հաշվապահի ստորագրությունները։

Պատերազմից ամիսներ են անցել, սակայն «Հայաստան» համահայկական հիմնադրամի պատերազմի օրերին հավաքագրված գումարի, ծախսերի մասին հակասական տեղեկություններն այդպես էլ չեն պարզաբանվել։ Հայտնի չէ, թե Հայկակ Արշամյանի ղեկավարած հիմնադրամը ինչպես է տնօրինել հավաքված միլիոնավոր դոլարները։ Հիշեցնենք, որ 44–օրյա պատերազմի ընթացքում «Հայաստան» համահայկական հիմնադրամին նվիրաբերվեց շուրջ 170 միլիոն դոլար: Ավելի ուշ հայտնի դարձավ նաև, որ հիմնադրամը 52 միլիարդ 703 միլիոն դրամ է փոխանցել կառավարությանը՝ պետության, ռազմական դրություն հայտարարելու հանգամանքներով պայմանավորված ենթակառուցվածքների, սոցիալական և առողջապահական ծախսերի ֆինանսավորման նպատակով օգտագործելու պայմանով։

Էսպրեսո-սրճեփ, սուրճ, կաթնային շոկոլադ, գազավորված եւ չգազավորված ջուր, հեռուստացույց… սրանք այն ապրանքներն են, որոնք գնել է կառավարության կողմից ստեղծված «Հայաստանի պետական հետաքրքրությունների ֆոնդ» ՓԲԸ-ն, որի տնօրենների խորհրդի նախագահը Տիգրան Ավինյանն է՝ իշխող «Քաղաքացիական պայմանագիր» կուսակցության Երեւանի քաղաքապետի ապագա թեկնածուն: Բացի այս անիմաստ ծախսերից կան ավելի լուրջ խնդիրներ։ Մասնավորապես Փաստինֆո կայքը գրել էր, որ ԱՆԻՖ-ի Հայաստանի պետական հետաքրքրություններին ֆոնդի (ԱՆԻՖ) ղեկավար կազմում ներգրավված օտարերկրացի անդամները անհաղորդ են, եթե չասենք՝ մեկուսացված են ԱՆԻՖ-ին վստահված ԶՄՊԿ-ի բաժնետոմսերի կառավարումից։

Լոռիում արդեն չորս տարի քննում են՝ մարզպետարանի ենթակայության հիմնադրամներում չարաշահումներ և յուրացումներ եղե՞լ են, թե ոչ։ Խոսքը կրթության, մշակույթի և առողջապահության ոլորտներում մինչև հեղափոխությունը գործած 3 հիմնադրամների մասին է, որոնցից երկուսի տնօրեններին արդեն երկու տարի է՝ մեղադրանք է առաջադրված։ Դատախազությունից չեն հստակեցնում՝ յուրացման ինչ դեպքեր են հայտնաբերվել, չեն հայտնում նաև, թե ինչու չի ավարտվում արդեն չորս տարի ձգվող նախաքննությունը։ Հայտնի է միայն, որ այս գործով մեղադրանք է առաջադրվել Մայիս Խաչատրյանին, ով Լոռու գործող մարզպետ Արամ Խաչատրյանի հայրն է։ Այսքանով, սակայն, կապերը գործող մարզպետի ընտանիքի հետ չեն ավարտվում․ հիմնադրամի չորս աշխատակիցներից մեկն էլ եղել է տնօրենի հարսը՝ մարզպետի կինը։

Բնականաբար, պատկան մարմինները, որոնք օպերատիվ կերպով 2018-ին սկսեցին քննել դիցուք՝ «Լույս» կամ «Երևան» հիմնադրամների հետ կապված կոռուպցիոն ռիսկերը, նույն ջանասիրությամբ չեն քննելու արդեն իշխող քաղաքական ուժի հովանու ներքո գործող ֆոնդերի ՝ բազմաթիվ հարցեր առաջացնող գործունեությունը...