Ուիլ Սմիթը ներողություն է խնդրել Քրիս Ռոքից՝ «Օսկարի» ժամանակ ապտակի համար
ԱյլԱմերիկացի դերասան Ուիլ Սմիթը ներողություն է խնդրել կատակերգու Քրիս Ռոքից՝ «Օսկար» մրցանակաբաշխության ժամանակ նրան ապտակելու համար։ Նա վեց րոպեանոց տեսանյութ է ձայնագրել և տեղադրել Instagram-ում։
Արտիստը խոստովանել է, որ վերջին երեք ամիսներին աշխատել է իր վրա և հասկացել է, որ իր արարքը վիրավորել է շատերին։ Նրա խոսքով՝ Ռոքն առայժմ հրաժարվում է խոսել և խոստացել է կապ հաստատել իր հետ, երբ պատրաստ լինի։
«Քրիս, ես ներողություն եմ խնդրում քեզնից: Իմ պահվածքն անընդունելի էր, և ես միշտ հասանելի եմ խոսելու համար»,- ասել է Սմիթը։
Նա նաև ներողություն է խնդրել կատակերգուի ընտանիքից և իր կնոջից՝ Ջադա Պինկետ Սմիթից, ում փորձել էր պաշտպանել։ Դերասանը պատմել է, որ իր կինը կապ չունի ստեղծված իրավիճակի հետ։