Բժիշկն անվանել է չիչխանի օգտակար հատկությունները

Չիչխանը B, A և C վիտամինների աղբյուր է։ Այդ նյութերի համակցությունը բարելավում է մաշկի և մազերի որակը, պաշտպանում է սիրտն ու արյունատար անոթները, Gazeta.Ru-ին տված հարցազրույցում ասել է սննդաբան, բժշկական գիտությունների դոկտոր Միխայիլ Գինսբուրգը։

Չիչխանի կանոնավոր օգտագործումը նպաստում է վերքերի և մանր կտրվածքների արագ ապաքինմանը, քանի որ հատապտուղները հարուստ են E և B վիտամիններով, որոնք պատասխանատու են բջիջների վերականգնման համար և արագացնում են ապաքինման գործընթացը:

«Քանի որ A և E վիտամինները հակաօքսիդանտներ են, պաշտպանում են վաղաժամ ծերացումից և քաղցկեղից։ Սիրտն ու արյան անոթները նույնպես պաշտպանության կարիք ունեն, որն ապահովում են հատապտուղի բաղադրության մեջ պարունակվող հակաօքսիդանտ նյութերը»,- կիսվել է բժիշկը։

Գինսբուրգը խորհուրդ է տալիս օրական առնվազն մեկ թեյի գդալ չիչխան ուտել, սակայն որոշ մարդիկ պետք է զգույշ լինեն այն իրենց սննդակարգում ներառելու հարցում:

«Ավելի լավ է հրաժարվել չիչխանից աղեստամոքսային տրակտի հիվանդությունների սրման ժամանակ․ այն պարունակում է բավականին մեծ քանակությամբ ասկորբինաթթու, որը գրգռիչ ազդեցություն է ունենում ստամոքսի լորձաթաղանթի վրա»,- զգուշացրել է մասնագետը։

Չիչխանի օգտակար հատկությունները չեն կորչում արագ սառեցման ժամանակ։ Հատապտուղները կարելի է ավելացնել մրգային ըմպելիքներին կամ բուսական թեյերին։