Բերձորի ու Աղավնոյի մասին տարբեր հայտարարություններ. Փաշինյանը խաբել է. «Ժողովուրդ»

«Ժողովուրդ» օրաթերթը գրում է. «Երթուղու փոփոխություն տեղի ունենալու պարագայում այն տարածքները, որոնք չեն գտնվում նախկին ԼՂԻՄ սահմանի մեջ, անցնելու են Ադրբեջանի վերահսկողությանը»,- այս մասին վարչապետ Նիկոլ Փաշինյանը հայտարարել էր հունիսի 27-ին՝ մամուլի ասուլիսի ժամանակ պատասխանելով հարցին, թե Բերձորը շրջանցող նոր ճանապարհի շահագործման դեպքում Բերձոր, Աղավնո և Սուս գյուղերն անցնելո՞ւ են Ադրբեջանին, թե՞ ոչ:

«Ըստ էության, Լաչինում այսօր, նաև Արցախի իշխանության հետ այդ հարցերը քննարկում ենք, ընտանիքներ չեն ապրում, Աղավնո գյուղի բնակչների խնդիրներն Արցախի կառավարության միջոցներով, կարծում եմ, կլուծվեն, Սուսի վերաբերյալ ոչինչ չեմ կարող ասել, այս պահին տեղեկություններ չունեմ», – հավելել էր Նիկոլ Փաշինյանը։

Փաշինյանն, ըստ երևույթին, դեռ մեկ ամիս առաջ էր հասարակությանը տրամադրում, որ Բերձորն ու Աղավնոն անցնելու են Ադրբեջանին, օրերես սակայն՝ կառավարության նիստի ժամանակ, բոլորովին այլ շեշտադրում ունեցող հայտարարությամբ հանդես եկավ, ասելով. «Բերձորի երթուղու փոփոխություն պետք է տեղի ունենա այն բանից հետո, երբ ռուս խաղաղապահները վերահսկողություն սահմանեն նոր երթուղու նկատմամբ»:

Այս հայտարարությանն, ի դեպ, նախորդել էր Անվտանգության քարտուղար Արմեն Գրիգորյանի հայտարարությունն այն մասին, որ «Լաչինի միջանցքն այլ երթուղով փոխարինելու Ադրբեջանի պահանջը լեգիտիմ չէ»:

Երեկ արդեն լրատվամիջոցները գրեցին, որ Արցախի տարածքային կառավարման ու ենթակառուցվածքների նախարար Հայկ Խանումյանն Աղավնոյի բնակիչներին զգուշացրել է, որ մինչև օգոստոսի 25-ը պետք է լքեն Աղավնո: