Բրիտանացիներին կոչ են արել մեկ րոպե պակաս ցնցուղ ընդունել՝ ջուր խնայելու համար

Մեծ Բրիտանիայի բնակիչներին կոչ են արել մեկ րոպե պակաս ցնցուղ ընդունել՝ ջուր խնայելու համար: Այս մասին հայտնում է The Sunday Times-ը՝ հղում անելով ջրամատակարարող ընկերությունների աղբյուրներին։

Նպատակն է մինչև 2050 թվականը ջրի օրական սպառումը մեկ քառորդով կրճատել՝ օրական 145 լիտրից հասցնելով 110 լիտրի։ Պարբերականը նշում է, որ 30 լիտր ջրի խնայողությունը համարժեք է eco ռեժիմով աման լվացող մեքենայում երեք լվացքի կամ ժամանակակից զուգարանում վեց լվացման։ Բացի այդ, բրիտանական իշխանությունները որոշել են կառուցել առաջին ջրի պահեստային բաքը 1992 թվականից ի վեր։ Սպասվում է, որ այն պատրաստ կլինի մինչև 2029 թվականը։

Իշխանությունները կոչ են անում խնայել ջուրը աննորմալ ջերմաստիճանի ֆոնին։ Հուլիսին եվրոպական երկրներում ռեկորդային շոգ է գրանցվել: Հուլիսի 19-ին Մեծ Բրիտանիայում գրանցվել է չափումների պատմության մեջ ամենաբարձր ջերմաստիճանը՝ մայրաքաղաքի Հիթրոու օդանավակայանի տարածքում եղել է 40,2 աստիճան։ Երաշտը հանգեցրել է նրան, որ Թեմզա գետի ակունքը, որը գտնվում է Գլոսթերշիրում, չորացել է և ութ կիլոմետր շարժվել հոսանքով ներքև։ «Մեր փոփոխվող կլիմայի պայմաններում կարող ենք ակնկալել, որ երաշտի և ջրի սակավության նման ժամանակաշրջանների հաճախականությունն ու խստությունը կավելանա՝ նվազող ռեսուրսների համար մրցակցության աճով», - նախազգուշացրել է Ռոբ Քոլինզը` Մեծ Բրիտանիայում գործող The Rivers Trust բարեգործական կազմակերպությունից: