Տիգրան Ավինյանն ապահովագրում է իրեն՝ Փաշինյանի կողմից «քցված» լինելուց

Այսօր «Սուրմալու» առեւտրի կենտրոն ժամանած նախկին փոխվարչապետ Տիգրան Ավինյանը ռեզոնանսային հայտարարություն է արել` նշելով, որ այդտեղ է որպես «Քաղաքացիական պայմանագիր» կուսակցության վարչության անդամ եւ որպես «Քաղաքացիական պայմանագիր» կուսակցության կողմից առաջադրվելիք քաղաքապետի թեկնածու։ Ըստ էության, նմանատիպ շեշտադրումով Ավինյանը նախընտրական քարոզչության համար նախատեսված ժամկետից շուտ մտավ նախընտրական պայքարի մեջ: Հանրության կողմից այս քայլը միանշանակ չընդունվեց, քաղաքացիները  սոցիալական ցանցերում իրենց վրդովմունքն են հայտնում, որ ՔՊ քաղաքապետի թեկնածուն նախընտրական քարոզչության ստարտ է ընտրել ողբերգության վայրը, երբ դեռ կան անհետ կորածներ և պարզ չէ զոհերի վերջնական թիվը:

Տարիներ առաջ նման վարքագիծը վրդովմունք էր առաջացնում նաև այն ժամանակվա ընդդիմադիրների՝ Նիկոլ Փաշինյանի և իր թիմակիցների մոտ: Դիցուք, երբ 2006 թվականին, դեռևս ՊՆ նախարարի պաշտոնը զբաղեցնող Սերժ Սարգսյանը քարոզարշավի պաշտոնական բացումից շաբաթներ առաջ սկսեց դիրքավորվել որպես նախագահի ապագա թեկնածու, ընդդիմադիր մամուլը դա բնութագրեց հետևյալ կերպ. «Արդեն բավական ժամանակ է, ինչ պաշտպանության նախարար Սերժ Սարգսյանը բան ու գործ թողած զբաղվում է նախընտրական քարոզչությամբ: Հանկարծ հիշել է, որ զինծառայողները նաեւ հարազատներ ունեն, եւ գյուղեգյուղ ընկած հանդիպում է նրանց հետ, Հանրային ռադիոյով ամեն օր պատասխանում է հարցերին, շախմատիստներին հետեւը գցած այստեղ-այնտեղ հանդիպումներ է ունենում, ջրագիծ-բան է բացում եւ այլն»: Ընդդիմադիրները կոչ էին անում ԿԸՀ-ին ուսումնասիրել Սարգսյանի այս ֆալստարտը ու PR-ը և տալ դրան համապատասխան գնահատական:

Նմատիպ իրավիճակ էր նաև 2017 թվականին: Ապրիլի 2-ին կայանալիք խորհրդարանական ընտրությունների քարոզարշավը, ըստ օրենքի, պետք է մեկնարկեր մարտի 5-ին: Սակայն, ՀՀԿ-ն ժամանակից առաջ անցնելով՝ Երեւանի տարբեր հատվածներում տեղադրել էր իր ցուցակով առաջադրված ու չառաջադրվածների դիմապատկերներով քարոզչական պաստառներ: Այդ պաստառների թվում գերակշռում էր վարչապետ Կարեն Կարապետյանի նախընտրական պաստառները, իսկ ինքը` Կարապետյանը, ընտրություններից շաբաթներ առաջ սկսել էր ծրագրային հարցազրույցներ տալ և խոսել ապագայի պլանների մասին: Բնականաբար, ընդդիմությունը՝ ի դեմս Փաշինյանի և թիմակիցների, սա նույնպես դիտարկեց իբրև օրենքի պահանջի կտրուկ խախտում և պահանջեց ԿԸՀ-ից պատժել ՀՀԿ-ին և Կարապետյանին; 

Անգամ, եթե նախկին իշխանության ներկայացուցիչները օրենքի խախտումով նախընտրական քարոզարշավ էին սկսում, այնուամենայնիվ դա ակնհայտորեն չէր արվում ողբերգության ֆոնին, այն էլ պաշտոնապես հայտարարված սգո օրով: Դժվար է պատկերացնել, թե ինչ բուռն արձագանքի կարժանանային Հանրապետականները, եթե նրանցից որևէ մեկը փորձեր քաղաքական դիվիդենտներ հավաքել համազգային աղետի ֆոնի վրա: 

Հետևաբար հարց է առաջանում՝ ինչո՞ւ Տիգրան Ավինյանը գնաց նման քայլի, հատկապես, երբ իր թիմակիցները և անձամբ Նիկոլ Փաշինյանը նախկինում այսպիսի ֆալստարտերին հստակ գնահատական են տվել:  Ակնհայտ է, որ Ավինյանը չէր կարող չգնահատել իր այս հայտարարության հանրային արձագանքները և իմիջային հետևանքները: Չի բացառվում, որ չնայած ամիսներ առաջ արված պաշտոնական հայտարարության՝ ՔՊ ներսում դեռևս հստակություն չկա այն հարցում, թե ով է ի վերջո լինելու Երևանի քաղաքապետի իշխող ուժի թեկնածուն: Գործող քաղաքապետ Հրաչյա Սարգսյանն իր հրապարակային հարցազրույցների ընթացքում բազմիցս է ակնարկել, որ հեշտությամբ չի պատրաստվում զիջել իր տեղը Տիգրան Ավինյանին: ճիշտ է` բացահայտ առճակատման Հրաչյա Սարգսյանը չի գնացել, սակայն իր ամբիցիաները հրապարակավ ուրվագծել է: Չի բացառվում, որ ՔՊ շարքերում լինեն նաև ուրիշ, ոչ պակաս ամբիցիոզ անձինք, ովքեր «աչք կունենան» քաղաքապետի աթոռի վրա:  Եվ հենց այդ ներքին խմորումների և ընթացող ստվերային պայքարի ֆոնին Ավինյանի այս հայտարարությունը ավելի շատ նման է  իրեն ապահովագրելուն, որպեսզի հետագայում Նիկոլ Փաշինյանին շատ ավելի բարդ լինի՝  «քցել» իրեն և վերջին պահին Երևանի քաղաքապետի այլ թեկնածուի անուն հնչեցնել: Թերևս Տիգրան Ավինյանը լավ է ծանոթ Փաշինյանի ոճին և հենց դա է նրան ստիպում իմիջային վնասի գնով փորձել պահպանել քաղաքապետ դառնալու շանսերը՝ նվազեցնելով ՔՊ-ի և Նիկոլ Փաշինյանի մանևրելու հնարավորությունները: