ՔՊ-ականներից ովքեր են օրենքի առջև ավելի «հավասար», քան բոլորը

Հեղափոխության օրերին, ինչպես նաև դրանից հետո, Նիկոլ Փաշինյանը և թիմակիցները փորձում էին հանրությանը համոզել, որ այսուհետև Հայաստանում օրենքի առաջ հավասար են լինելու բոլորը: Այս սկզբունքը կարելի է ասել կարևորագույններից մեկն էր, որը ամրագրվեց ժողովրդի հետ կնքված քաղաքացինական պայմանագրով:

Սակայն, այդ նույն հեղափոխությունից չորս տարի անց հետ հայացք գցելով տեղի ունեցած իրադարձություններին և դրվագներին` հասկանում ես, որ օրենքի առջև բոլորի հավասարությունն ընդամենը գեղեցիկ բաժակաճառ էր:

Դիցուք՝ ՀՀ ոստիկանությունում օպերատիվ տվյալներ էին ստացվել 2021 թ. հունիսի 20-ին կայանալիք ԱԺ արտահերթ ընտրություններին մասնակցող դաշինքի օգտին քվեներ ապահովելու և Ջանֆիդա գյուղի բնակիչների շրջանում ընտրակաշառք բաժանելու համար Արմավիր քաղաքի նախկին քաղաքապետի՝ նույն դաշինքի պատգամավորի թեկնածուների ցուցակում ընդգրկված Ռուբեն Խլղաթյանի կողմից, նախապես ձեռք բերված պայմանավորվածության համաձայն, Ջանֆիդա գյուղի բնակիչ Գ.Պ.-ին 9.000.000 ՀՀ դրամ գումար փոխանցելու վերաբերյալ: Արդյունքում` Արմավիրի նախկին համայնքապետը կալանավորվեց: Միևնույն ժամանակ ջրից չոր է դուրս եկել Լոռու մարզպետ, ՔՊ-ական Արամ Խաչատրյանը, ում մասով մամուլում բազմաթիվ հրապարակումներ էին հայտնվել՝ կրկին կապված ընտրակաշառք բաժանելու հետ:

ՀՀԿ-ական նախկին պատգամավոր Մուրադ Մուրադյանի որդու՝ ոստիկաններին հայհոյելու դրվագը առանձնակի ուշադրության արժանացավ և հետաքննվեց, իսկ ահա ՔՊ-ական պաշտոնյաների՝ հանրության այս կամ սեգմենտի ներկայացուցիչներին հրապարակավ հայհոյելը, չգիտես ինչու, չի նկատվել: Օրինակ՝ Նիկոլ Փաշինյանի «Քաղաքացիական պայմանագիր» կուսակցության ղեկավար մարմնի անդամ Սարգիս Ալեքսանյանը ֆեյսբուքյան իր էջում հայհոյել է Մարդու իրավունքների պաշտպանին՝ աջակցություն հայտնելով լրագրողի նկատմամբ հարձակում գործած ԲՏԱ նախարարին: Մեկ այլ օրինակ՝ «Հայանտառ»-ի Սիսիանի մասնաճյուղի տնօրեն, «Քաղաքացիական պայմանագիր» խմբակցության պատգամավոր Կարեն Համբարձումյանի եղբայր Տիգրան Համբարձումյանն օրերս վիրավորական, հայհոյախառն արտահայտություններ է գրել Ֆեյսբուքի օգտատեր, Մոսկվայից Հայաստան եկած բլոգեր Մերի Տոմոյանի ուղիղ եթերի ժամանակ: Եվ գրելիս այն կարգի է ազարտի մեջ ընկել, որ վիրավորել ու հայհոյել է նաև զոհվածների հարազատներին։ Իսկ ՔՊ-ական պատգամավոր Վահե Ղալումյանն էլ հրապարակավ հայհոյում էր տավուշցիներին:

Երրորդ նախագահ Սերժ Սարգսյանի եղբայրը՝ Լևոն Սարգսյանը, և նրա որդին մեղադրվում էին ապօրինի հարստացման հոդվածով: Սակայն, չգիտես ինչու, իրավապահներին բացարձակապես չի հետաքրքրում թե ինչպես է հարստացել՝ դիցուք՝ վարչապետի աշխատակազմի ղեկավարի տեղակալ Բագրատ Բադալյանը: Մամուլը օրեր առաջ գրել էր այն մասին, որ վերջինս 2021 թվականի մայիսին 584 հազար 950 դոլարով տուն է գնել ԱՄՆ Մերիսվիլ քաղաքում:

2016-ին ընդդիմությունը ահազանգում էր, որ պետական գույքը շուկայականից էժան գնով և ուղղակի վաճառքի ձեւով օտարվում է Նոր Նորք համայնքի ՀՀԿ-ական ավագանի, «Ջրվեժ-1» համատիրության նախագահ Վրեժ Դավթյանին: Իսկ ինչ ունենք այսօր: Դիլիջանի համայնքապետ  Դավիթ Սարգսյանը, կարծես թե, սովորություն է դարձրել շուկայականից ցածր գնով պետական հողեր օտարելը: Դիցուք՝ համայնքապետարանի ինտերնետային կայքից տեղեկանում ենք, որ Դիլիջանի համայնքի ղեկավարի 2022թ. մայիսի 20-ի թիվ 340-Ա որոշմամբ 2022թ. հունիսի 21-ին աճուրդի է ներկայացվել Դիլիջան համայնքի սեփականությունը հանդիսացող Բնակավայրերի հողերից 240.0քմ հողամաս /Լոտ-17(ՔՀ-22)/, Դիլիջան քաղաք, Շամախյան փողոց թիվ 39/1 հասցեում բնակելի տան կառուցման նպատակով, 1680000 դրամ մեկնարկային գնով: Կայացած աճուրդում 1764000 դրամ առավելագույն գնով հաղթել է Դիլիջան քաղաքի Աբովյան փողոց թիվ 58/1 հասցեի բնակիչ Արշավիր Եսայանը, որի մասին հողամասերն աճուրդային կարգով օտարող հանձնաժողովի կողմից կազմվել է թիվ 2 արձանագրությունը:

Պաշտոնեական լիազորությունները չարաշահելու համար մեղադրանք էր առաջադրվել նաև Երևանի նախկին քաղաքապետ Տարոն Մարգարյանին: Միևնույն ժամանակ, արդյո՞ք չէր չարաշահում պաշտոնեական դիրքը նախկին նախարար Արսեն Թորոսյանը, ով  ԵՊԲՀ ռեկտոր էր փոխում՝ չունենալով դրա լիազորությունները:

Ահա այսպիսի պատկեր ունի Նոր Հայաստանում օրենքի առջև բոլորի հավասարությունը, ինչպես երևում է` մի բան այս սկզբունքը իմպլեմենտացնելու հարցում սխալ է գնացել և արդյունքում՝ ՔՊ-ականների համար օրենքը մի փոքր ավելի հավասար է, քան մյուսների համար...