Ինչու է Փաշինյանը մոռացել՝ նախկին պաշտոնյաներին և օլիգարխներին ուղղված մեղադրանքները

Հայաստանի իշխանությունները հեղափոխությունից հետո պայքար հռչակեցին ապօրինի հարստացման դեմ, նրանց ուշադրության կենտրոնում պետք է լինեին նաև այն պաշտոնյաները, ովքեր նախորդ տարիների ընթացքում ապօրինի գույք էին ձեռք բերել: Եվ, իսկապես, որոշակի առաջընթաց այս առումով առկա է: Ընդունվեց համապատասխան օրենք և մի շարք նախկին պաշտոնյաներ հայտնվեցին իրավապահների ուշադրության կենտրոնում:

Շուրջ մեկ ամիս առաջ՝ հուլիսի 27-ին, ՀՀ Գլխավոր դատախազությունը հաղորդագրություն տարածեց, համաձայն որի՝ Դատախազության կողմից ապօրինի ծագում ունեցող գույքի բռնագանձման վերաբերյալ ներկայացված 12-րդ հայցադիմումն է ընդունվել վարույթ: Այն 2022թ. հուլիսի 11-ին ընդունվել է վարույթ: Ներկայացված հայցերը վերաբերում են Սերոբ Հարությունյանին, Արամ Հարությունյանին, Արամ Վարդանյանին, Վահրամ Գուրօղլյանին, Գալուստ Գրիգորյանին, Արտակ Յայլոյանին, Փայլակ Յայլոյանին, Սեյրան Օհանյանին, Վաչագան Ղազարյանին, Մանվել Գրիգորյանին, Նարեկ Սարգսյանին և նրանց հետ փոխակապակցված անձանց պատկանող ապօրինի ծագում ունեցող գույքերի բռնագանձմանը;

Սակայն, ուշագրավն այս պատմության մեջ այլ բան է: Այն հանգամանքը, որ հեղափոխությունից տարիներ առաջ ընդդիմադիր Նիկոլ Փաշինյանը հասցեական մեղադրանքներ էր հնչեցնում այն ժամանակ դեռ գործող պաշտոնյաների, գործարարների, օլիգարխների հասցեին: Դիցուք՝ երբ Նիկոլ Փաշինյանը խոսում էր Մոնումենտի դղյակների մասին, ապա նա դժվար թե տեղյակ չլիներ այն հանգամանքին, որ այնտեղ դղյակ ուներ նաև վարչապետ Կարեն Կարապետյանը: Սակայն, հեղափոխությունից հետո Կարեն Կարապետյանը ընդհանարպես որևէ քրեական գործով չի անցնում, նրա անունը գրեթե չի հնչել և չի հնչում:

Նիկոլ Փաշինյանը ԱԺ-ում հարց էր հնչեցնում՝ մոնոպոլի՞ստ է արդյոք Սամվել Ալեքսանյանը: Նրա հարցում, ի դեպ, առկա էր նաև պատասխանը:  Եվ եթե Սամվել Ալեքսանյանը մոնոպոլիստ է, նշանակում է նա ապօրինի է հարստացել: Բայց արի ու տես, որ հեղափոխությունից հետո Սամվել Ալեքսանյանը ոչ միայն չհայտնվեց իրավապահների ուշադրության կենտրոնում, այլ մի բան էլ մշտապես արտոնությունների է արժանանում կառավարության կողմից:

Նախագահ Սերժ Սարգսյանը խաղատներում պարտվում է մեր երկրի բյուջեն՝ մսխելով մեր պետականությունը: 2018-ից հետո մոռացվեցին ինչպես խաղատներում պարտված միլիոնները, այնպես էլ պետականությունը մսխելու հանգամանքը:

 Հանրապետականի «Եկեք հիշենք պատմությունը» կոչի շրջանակներում պատգամավորի թեկնածու Նիկոլ Փաշինյանը ընտրողներին առաջարկում էր նայել 1995թ.-ի վարչապետ Տիգրան Սարգսյանի լուսանկարները. «Էդ լուսանկարներում խեղճը էնենց ա, ոնց որ մի տարի հաց կերած չլինի, ոնց որ կոնցլագերի գերի լինի: Հիմա էս մարդու բանկային հաշիվների վրա 1 մլն դոլար քեշ փող կա»: Բացի այն, որ Փաշինյանը Տիգրան Սարգսյանին մեղադրում էր ապօրինի հարստացման մեջ, նա նաև բազմիցս հայտարարել էր, որ Սարգսյանը օֆշորներում է թաքցնում բյուջեից գողացված գումարները: Ինչպես գիտենք, հեղափոխությունից հետո այս մեղադրանքների հետքերով նույնպես պատկան մարմինները որևէ քննչական գործություն չեն ձեռնարկել 

Նիկոլ Փաշինյանը որոշակի կասկածներ ուներ նաև Ջերմուկ Գրուպի սեփականատեր Աշոտ Արսենյանի կուտակած ունեցվածքի վերաբերյալ, ինչպես նաև հայտնի ՀՀԿ-ական գործարար Հարություն  Փամբուկյանի՝ օրինական ճանապարհով հարստանալու փաստի վերաբերյալ: 

Բայց արի ու տես, որ հեղափոխությունից անցել է չորս տարի, սակայն, վերը նշված նախկին պաշտոնյաները այդպես էլ չեն հայտնվել իրավապահների ուշադրության կենտրոնում: Հարց է առաջանում՝ ընդդիմադիր Նիկոլ Փաշինյա՞նն էր կեղծ մեղադրանքներ հնչեցնում նրանց հասցեին: Այդ դեպքում, ինչու այդ նույն իրավապահները չեն զբաղվում հենց վարչապետով: Թե հեղափոխությունից հետո, ի տարբերություն այլ նախկին պաշտոնյաների, ովքեր այսօր քրեական գործերով ֆիգուրանտներ են, վերը նշված պաշտոնյաների հետ հնարավոր  է եղել հասնել ինչ-ինչ համաձայնությունների, արդյունքում` նրանք ոչ թե մեղադրյալի կարգավիճակում են, այլ արտոնյալների...