Մեղադրյալներից՝ արտոնյալ. ինչպես է Փաշինյանը «մաքրում» ՀՀԿ-ական օլիգարխներին

Վերլուծական 2 Սեպտեմբեր, 2022 20:27

Մեղադրյալներից՝ արտոնյալ. ինչպես է Փաշինյանը «մաքրում» ՀՀԿ-ական օլիգարխներին

Հեղափոխությունից առաջ ընդդիմադիր Նիկոլ Փաշինյանն աչքի էր ընկնում Հանրապետական օդիոզ օլիգարխների և գործարար պաշտոնյաների հասցեին հնչեցրած իր բավական լուրջ մեղադրանքներով: Նա հրապարավ վերջիններիս մեղադրում էր՝ ընդհուպ մինչ սպանության կազմակերպման, կոռուպցիայի, փողերի լվացման մեջ: Իսկ ահա հեղափոխությունից հետո իրավիճակը կտրուկ փոխվեց, նախկին մեղադրյալները դարձան Նիկոլ Փաշինյանի մտերիմ օլիգարխները, իսկ նրանք, ում հետ Փաշինյանը անձամբ չհաստատեց մտերիմ հարաբերություններ, զգում են վերջինիս վերաբերմունքը՝ պարբերաբար ստացվող արտոնությունների տեսքով:

Դիցուք՝ Նիկոլ Փաշինյանը ՀՀԿ-ական պատգամավոր Սամվել Ալեքսանյանին մեղադրում էր մոնոպոլիայի և սպանության կազմակերպման մեջ: Ահա այդ մեղադրանքներից մի քանիսը:

Հեղափոխությունից հետո Սամվել Ալեքսանյանը կարճ ժամանակահատվածում դարձավ Նիկոլ Փաշինյանի սրտի օլիգարխը: Նրա «Ալեքս Տեքստիլ»-ը պարբերաբար արտոնություններ է ստանում կառավարությունից, իսկ ինքը` Փաշինյանը, արդեն մոռացել է նախկինում իր հնչեցրած մեղադրանքների մասին:

Ջերմոցային մաֆիան, ըստ ընդդիմադիր Փաշինյանի, նախկինում միլիոններ էր դիզել ապօրինի բիզնես իրականացնելով: Նա հայտարարում էր, որ վարդերի ջերմոցների մեծ սիրահար է նաև Սերժ Սարգսյանի նախկին խորհրդական Արամ Ղարիբյանը, ում «Էկոտոմատո» և «Արմյանսկի ուրաժայ» ընկերությունները, ունենալով արտահանման հսկայական ցուցանիշներ, չգիտես ինչպես, երբեք չեն հայտնվել խոշոր հարկատուների 1000-ում: Հեղափոխությունից հետո այս ընկերությունը մտավ արտոնյալների նեղ շրջանակի մեջ:

ՀՀԿ-ական պատգամավոր Աշոտ Արսենյանին Նիկոլ Փաշինյանը մեղադրում էր Սերժ Սարգսյանի աջ ձեռքը լինելու, բիզնես մենաշնորհի, տարատեսակ արտոնություններին օգտվելու մեջ: Փաշինյանի ընտանեկան կայքը մշտապես մոնիտորինգի էր ենթարկում Արսենյանի ներկայացրած ֆինանսական հայտարարագրերը: Հեղափոխությունից հետո Արսենյանի «Ջերմուկ Գրուպ»-ը, որին այդքան թիրախավորում էր ընդդիմադիր Փաշինյանը, պարբերաբար կառավարությունից արտոնություններ է ստանում, իսկ Արսենյանի որդին՝ Վահագն Արսենյանը, ոչ միայն ազատեց գլուխը քրեական գործից, այլ նաև դարձավ Ջերմուկի համայնքապետ:

Բանանի շուկայի արքա Միհրան Պողոսյանին Նիկոլ Փաշինյանը մեղադրում էր Հայաստանը օֆշորային սկանդալի մեջ ներքաշելու մեջ: Հեղափոխությունից հետո այս մեղադրանքները թեև չջրվեցին, սակայն դրանք չեն խանգարում, որպեսզի Միհրան Պողոսյանի քեռուն` Ազգային անվտանգության ծառայության պետի նախկին տեղակալ Գրիշա Հարությունյանին, ծաղկեցնել իր բիզնեսը Հայաստանում: Գործադիրը պարբերաբար հավանության է արժանացնում «Ասկե գրուպ» բաց բաժնետիրական ընկերության կողմից ներկայացված գործարար ծրագրերը:

ՀՀԿ-ական նախկին պատգամավոր Վահրամ Բաղդասարյանի հետ առչնվող «Վաբա» ՍՊԸ-ն հեղափոխությունից հետո երեք տարի ժամկետով արտոնություն ստացավ Փաշինյանի կաբինետից: Մինչդեռ մինչ 2018-ը Նիկոլ Փաշինյանը Վահրամ Բաղդասարյանին մեղադրում էր բոլոր հնարավոր և անհարին մեղքերի մեջ:

ՀՀԿ-ական քաղաքապետ, Գյումրի քաղաքի ղեկավար Սամվել Բալասանյանի բիզնեսը նույնպես ժամանակին հանգիստ չէր տալիս ընդդիմադիր Փաշինյանին: Նա հաճախ էր հրապարակավ ակնարկում, որ պատկան մարմինները բավարար ուշադրություն չեն դարձնում դիցուք՝ Գյումրի գարեջրի գործարանին: Ի՞նչ փոխվեց հեղափոխությունից հետո: Փաշինյանն ու Բալասանյանը նույնիսկ մի քանի անգամ շրջել են միասին Գյումրիի փողոցներում:

Նրա դեմ թեև քրեական գործ է հարուցվել, սակայն պարզից էլ պարզ է որ այդ գործը ավարտին չի հասցվի, քանի որ Բալասանյանը արդեն իսկ հոժարակամ ՔՊ-ին զիջեց Գյումրիի դե-ֆակտո ղեկավարումը:

Ինչպես տեսնում ենք՝ Նիկոլ Փաշինյանը բավականին կարճ հիշողություն ունի՝ օլիգարխների և ՀՀԿ-ական մեծահարուստ պաշտոնյաների հասցեին իր հնչեցրած վաղեմի մեղադրանքների մասով: Այժմ նրանց մի մասը կամ արտոնյալ է և Փաշինյանի սրտի օլիգարխ, կամ հանգիստ ապրում է արտասահմանում՝ պահպանելով իր բիզնեսը: Ինչ վերաբերվում է Փաշինյանի մեղադրանքներին, ապա փաստենք, որ դրանք ոչ հաստատվեցին, ոչ էլ հերքվեցին, այդ դեպքում հարց է առաջանում՝ հեղափոխությունից հետո ինչ ստվերային պայմանավորվածություն է ձեռք բերել Նիկոլ Փաշինյանը «մեղադրյալների» հետ...