Ում յուրայիններն են պայքարում ՊԵԿ-ում «Նակոլկա Շուշոյի» տեղը զբաղեցնելու համար

Ամիսներ առաջ Նիկոլ Փաշինյանի որոշմամբ Շուշանիկ Ներսիսյանն ազատվեց ՊԵԿ նախագահի տեղակալի պաշտոնից։ Այդ պաշտոնում նա համակարգում էր մաքսային ոլորտը։ Պատճառը, ըստ տարածված տեղեկությունների, նրա և ՊԵԿ նախագահ Ռուստամ Բադասյանի միջև եղած կոնֆլիկտն է եղել: Մինչ օրս, սակայն, ՊԵԿ նախագահի տեղակալի պաշտոնը թափուր է և մամուլում պարբերաբար անունն են հնչում, թե ովքեր են հավակնում զբաղեցնել Նակոլկա Շուշոյի տեղը:

Շրջանառվող թեկնածուներից մեկը Տավուշի մարզպետ Հայկ Ղալումյանն է, ով նաև Նիկոլ Փաշինյանի քավորն է: Կարելի է ենթադրել, որ այս պաշտոնում նրա նշանակումը ձեռնտու է հենց Փաշինյանին, ամիսներ անց նա կկարողանա Ղալումյանին դարձնել ՊԵԿ նախագահ և էլ ավելի մեծ վերահսկողություն ունենալ այս կառույցի նկատմամբ: Սակայն, այստեղ էլ կադրային խնդիր է ի հայտ գալու, Փաշինյանին անհրաժեշտ կլինի Տավուշի նոր մարզպետ գտնել, իսկ դա ՔՊ կադրային սուղ բանկի պարագայում բարդ լուծվող խնդիր է:

Հաջորդ թեկնածուն Երևանի Նոր Նորք վարչական շրջանի արդեն նախկին ղեկավար Սուրեն Ղամբարյանն է:  Նրա կենսագրության ամենամեծ թռիչքը սոցիալական ծառայության պետի պաշտոնն էր, որին նա ընդամենը մի քանի ամիս դիմացավ՝ 2019 թվականի մարտից մինչև սեպտեմբեր: Այդ կառույցում նրա պաշտոնավարման վերջին ամիսներին մամուլը պարբերաբար անդրադառնում էր, որ լարված են  Ղամբարյանի, նրա տեղակալ Արսեն Օհանյանի, ինչպես նաեւ ծառայության գլխավոր քարտուղար Վանիկ Բաբաջանյանի հարաբերությունները։ Մամուլը նաև գրել էր, որ Ղամբարյանը սերտ կապերի մեջ է ԱԺ պատգամավոր Հայկ Սարգսյանի հետ, որը լոկոմոտիվի դեր է խաղում Ղամբարյանի կարիերայում:  Ղամբարյանը զբաղեցրել է նաև վարչապետի խորհրդականի պաշտոնը, որից ազատվելուց հետո էլ նշանակվել է վարչական շրջանի ղեկավար: Ի դեպ, շատ էր խոսվում սոցապից Ղամբարյանի հեռանալու պատճառների մասին:  Մամուլը գրում էր, որ այն ժամանակվա նախարար Զարուհի Բաթոյանին անհանգստացնում էր այն հանգամանքը, որ Ղամբարյանը աշխատում է հենց Սարգսյանի համար, առաջ տանում վերջինիս շահերը: Զարեհ Սարգսյանը դեռևս Լևոն Տեր-Պետրոսյանի ժամանակ երկար տարիներ աշխատել է այդ համակարգում, 1996-ին զբաղեցրել է սոցիալական ապահովության նախարարությանն առընթեր կենսաթոշակային վարչության պետի պաշտոնը, բայց իրենից հետո բարի հիշողություններ չի թողել։ Մեր օրերում էլ Սարգսյան ավագը փորձում է «կանտրոլի» տակ պահել նախարարությունը՝ կադրային քաղաքականությունում թելադրողի դերը ստանձնելով:

Նաև մեկ անհայտ դեմքի անուն է շրջանառվում՝ առողջապահության նախարարի նախկին տեղակալ Շավարշ Գրիգորյանի, որը 2021 թ․ հոկտեմբերին նշանակվել էր ՊԵԿ նախագահ Ռուստամ Բադասյանի խորհրդականի պաշտոնում։ Բնական է, որ այստեղ արդեն շահագրգռվածություն ունի հենց ինքը` Ռուստամ Բադասյանը, ով ևս փորձելու է իր յուրայինին տեղավորել տեղակալի պաշտոնում:  Շավարշ Գրիգորյանը նաև առողջապահության նախարարության «Առողջապահական ծրագրերի իրականացման գրասենյակ» պետական հիմնարկի տնօրենի պաշտոնակատար էլ է եղել, և առողջապահական համակարգից միանգամից տեղափոխվել է ՊԵԿ:

Թե ինչով կավարտվի այս մինի-պայքարը և թե ում յուրայինը ի վերջո կզբաղեցնի Շուշանիկ Ներսիսյանի աթոռը՝ ցույց կտա ժամանակը: Չի բացառվում, որ ընտրվի մեկ այլ ճանապարհ և ընդհանրապես կրճատվի ՊԵԿ նագախահի տեղակալի այն հաստիքը, որը այս պահին թափուր է մնացել: Սակայն, դա տեղի կունենա միայն այն դեպքում, երբ վերը նշված պաշտոնյաները չկարողանան կոնսենսուսի գան, թե իրենցից ում մտերիմն է դառնալու ՊԵԿ փոխնախագահ...