ՔՊ-ականների հարվածը՝ սեփական էլեկտորատի գրպանին. գյուղացիներն ու տաքսիստները՝ թիրախում

«Սերմերի մասին» Հայաստանի Հանրապետության օրենքի համաձայն, սերմերի հավաստագրումն իրականացվում է 2005 թվականից, սակայն հավաստագրի տրամադրման համար պետական տուրք սահմանված չի եղել: Էկոնոմիկայի նախարարությունը, ի դեմս Վահան Քերոբյանի, որոշել է, որ դա անչափ սխալ մոտեցում է և որոշել է շտկել իրավիճակը՝ համարելով, որ դա թելադրված է սերմնաբուծության և տնկարանային արտադրության զարգացման անհրաժեշտությամբ։ Թե ոլորտի վրա լրացուցիչ հարկային բեռ դնելը որքանո՞վ է նպաստում դրա զարգացմանը, հավանաբար միայն նախարարությունում գիտեն։

Քիչ էր գյուղացին հարված ստացել հեղափոխական իշխանություններից, մի բան էլ դեռ պետք է սերմի հարկ տա: Մինչդեռ հեղափոխությունից հետո Նիկոլ Փաշինյանը գյուղացիներին խոստանում էր գյուղատնտեսական հեղափոխություն իրականացնել:

Էկոնոմիկայի նախարարից հետ չի մնում տարածքային կառավարման նախարարությունը: Կառավարությունն առաջարկում է օնլայն տաքսի ծառայություններն  օրենքի դաշտ բերել, այն է՝ օնլայն հարթակների միջոցով ուղևորների փոխադրման պատվերներ ընդունելը  և փոխանցելը համարել ծանուցման ենթակա գործունեություն, իսկ նման պատվերով փոխադրում իրականացնող վարորդներից գանձել ֆիքսված պետական տուրք յուրաքանչյուր պատվերի համար։ Բնականաբար, այս որոշումից առաջին հերթին տուժելու են տաքսու վարորդները:

Գաղտնիք չէ, որ մարզերում, հատկապես գյուղաբնակ վայրերում, ՔՊ-ն 2018-ին ամենաշատ ձայներն է հավաքել և ընդհանրապես մարզերի բնակչությունն ակտիվորեն աջակցում էր Նիկոլ Փաշինյանին և նրա թիմին: Նույնը պետք է ասել տաքսու վարորդների մասով, նրանք հանուն Նիկոլ Փաշինյանի ճանապարհ փակողների առաջին շարքերում էին: Արդյունքում` այսօր ՔՊ-ական պաշտոնյաներն ընդունում են որոշումներ, որոնք ուղղակիորեն հարվածելու են իրենց հիմնական էլեկտորատի գրպանին, մինչդեռ հենց այս մարդկանց օգնությամբ նրանք 2018-ին եկան իշխանության` խոստանալով բարեկեցություն և նախկինների այսպես ասած՝ թալանի վերադարձ...