Փաշինյանի հակասական պնդումներն ու ինքնախոստովանական «ցուցմունքը»

Երեկ վարչապետ Նիկոլ Փաշինյանը ծավալուն հարցազրույց է տվել Հանրային հեռուստաընկերությանը, սակայն այդ հարցազրույցը, ինչպես և սպասվում էր, շատ քիչ թվով հարցերի պատասխաններ տվեց` առաջացնելով նորանոր հարցեր: Դիցուք՝ բազմաթիվ դրվագներով Նիկոլ Փաշինյանը հակասեց իր իսկ կողմից ամիսներ առաջ հնչեցրած մտքերին:

Արցախյան բանակցություններն իր սեփական կետից սկսկած Նիկոլ Փաշինյանը երեկ հայտարարում էր, որ Արցախն ու Ադրբեջանը պետք է բանակցեն միմյանց հետ, ըստ էության, դրանով փաստելով, որ Հայաստանը ձեռքերը լվանում է բանակցային գործընթացից և չի ցանկանում փոխկապակցել Արցախյան հարցի կարգավորման գործընթացը Հայաստան-Ադրբեջան հարաբերությունների կարգավորման գործընթացի հետ:

 2 օրից Հայաստանի եւ Ադրբեջանի ԱԳ նախարարները կսկսեն խաղաղության պայմանագրի տեքստի քննարկումները: Երեկ Հանրային հեռուստաընկերության եթերում այս մասին հայտարարեց ՀՀ վարչապետ Նիկոլ Փաշինյանը: Նկատենք՝ դեռ սեպտեմբերի 14-ին ՀՀ վարչապետ Նիկոլ Փաշինյանը խոսել էր խաղաղության պայմանագրի մասին եւ հետո ԱԱԾ-ի շուրթերով հերքել այն: Խոսքը ՀՀ ԱԺ-ում ունեցած իր ելույթի մասին էր։ Հենց նրա այս ելույթից հետո շրջանառվեց խաղաղության պայմանագիր ասվածը, որի մասին նաեւ Փաշինյանը նշեց եւ ժամեր անց հերքեց՝ ասելով. «Պաշտոնապես ասում եմ՝ թուղթ չեմ ստորագրել, որովհետեւ եթե ստորագրեի, կտեղեկացնեի, եւ չեմ պատրաստվում ստորագրեմ, եւ ընդհանրապես նման խոսակցություն չկա»։ Նույն օրը ԱԱԾ-ն տարածեց մի հայտարարություն, որում ասվում էր. «Վարչապետի խոսույթը վերաբերել է բացառապես Հայաստանի Հանրապետության արտաքին անվտանգությունը, ինքնիշխանությունը եւ կայուն խաղաղությունն ապահովող փաստաթղթի ստորագրման պատրաստակամությանը, որին պետք է ձգտել»: Երեկ պարզվեց, որ վաղը, երբ ԱԳ նախարարները հանդիպեն, հաշտության պայմանագրի շուրջ քննարկումներ կլինեն, հետեւաբար Նիկոլ Փաշինյանը հերթական անգամ խաբել ու մանիպուլացրել է:

Իր հարցազրույցում Փաշինյանը նաև խոսեց ՀԱՊԿ-ից դուրս գալու հավանականության մասին: Պարզվում է, այդ ոչ թե Հայաստանն է դուրս գալիս ՀԱՊԿ-ից, այլ լրիվ հակառակը: Մինչդեռ հիշում ենք, որ Փաշինյանը դեռևս ամիսներ առաջ նման հավանականությունը զրոյական էր գնահատում:

Խոսելով զենք ձեռք բերելու մասին՝ Փաշինյանն ակնարկեց, որ 70-ականների զենքը ոչ այլ ինչ է, քան մետաղի ջարդոն: Ըստ էության, նա փաստում է, որ իր կողմից ՝ Հորդանանից գնված 70-ականների ՕՍԱ-ները մետաղի ջարդոն էին, արդյո՞ք սա ինքնախոստովանական ցուցմունք չէ վարչապետի կողմից:

Փաշինյանը նաև մի շարք անհաջող փորձեր է կատարել մեղմացնելու՝ օրեր առաջ իր իսկ կողմից արված հայտարարությունների հանրային ռեզոնանսը: Մասնավորապես, կառավարության վերջին նիստի ժամանակ Փաշինյանը հայտարարել էր, որ մեր դաշնակիցներից մեկը չի կատարում զենքի մատակարարման իր պարտականությունը՝ չնայած, որ գումարը վճարված է: Բնականաբար, դաշնակից բառը լսելուց հետո հանրության մեծ մասը պետք է ենթադրեր, որ Փաշինյանը նկատի ունի ռուսական կողմին: Սակայն, երեկ վարչապետն իրեն բնորոշ մանիպուլացիաներով փորձեց հերքել, որ նկատի ուներ հենց ՌԴ-ին: Որքանով դա ստացվեց՝ դժվար է ասել:

Փաշինյանի հակասական մտքերը, ինչ խոսք, կարելի է բացատրել երկու հանգամանքով: Մի կողմից՝ նա փորձում է մանիպուլացնել սեփական հանրությանը, իսկ մյուս կողմից՝ նստել միանգամից երկու աթոռների վրա՝ ռևերանսներ անելով մեկ ռուսական կողմին, մեկ Արևմուտքին...