«Փաստը, որ հոկտեմբերի 27-ից հետո Վրաստանում արվեց այն ամենը, ինչ լինելու էր Հայաստանում, ոչ ոք չի բեկանել»․ Անահիտ Ադամյան

Անահիտ Ադամյանը Ֆեյսբուքի իր էջում գրում է․

 

«Համենայն դեպս ասեմ

1999-ի սեպտեմբերին վարչապետ Վազգեն Սարգսյանը ԱՄՆ-ից գալուց հետո ասուլիս տվեց ու հանգամանալից ներկայացրեց իր հանդիպումները ԱՄՆ փոխնախագահ Ալբերտ Գորից՝ Պետդեպարտամենտ ու Կոնգրես, նույնքան հանգամանալից ներկայացրեց ԱՄՆ-ում ձեռք բերված պայմանավորվածությունները: Ասուլիսից հետո ես մոտեցա՝ էքսկլյուզիվի համար: Համարյա ասուլիսի տևողությամբ զրույց ունեցանք, պայմանով, որ դեռ չեմ գրելու, ինքը կասի՝ երբ գրեմ: Ամբողջ պատմածը վերաբերում էր, թե ԱՄՆ-ից, Համաշխարհային բանկից ու Եվրաբանկից ինչքան ֆինանսներ են գալու, ինչ ներդրումներ են լինելու՝ որ ոլորտներում: Միլիարդների մասին էր խոսքը, Արցախի հարցի լուծման մասին էր, շրջափակումը հանելու ու Թուրքիայի հետ դիվանագիտական հարաբերությունների հաստատման: Միամիտ են նրանք, որ Վազգեն Սարգսյանին են անվանում միամիտ: Վազգեն Սարգսյանը ինչ ասում էր՝ անում էր:

Փաստը, որ հոկտեմբերի 27-ից հետո Վրաստանում արվեց այն ամենը, ինչ լինելու էր Հայաստանում, ոչ ոք չի բեկանել: Վազգեն Սարգսյանը ոչ թե օգնություն էր որոնում, այլ՝ ներդրում: Տասնյակից ավելի հարցազրույցներ կան դա ապացուցող: Վարչապետը ԱՄՆ չէր գնացել դրամահավաքի։ Դրամահավաք անողները լավ գիտեն, որ այդ նպատակով ոչ թե Վաշինգտոն, այլ Լոս Անջելես են գնում։

Հ.Գ.

Հերիք է սեփական սխալները, թուլությունը, վախերը, անզորությունը, անկարողությունը արդարացնելիս կախվեք Վազգեն Սարգսյանի փեշերից:

Դանտեն ասում էր՝ քար մի շպրտեք ճախրող արծվի վրա, նա ավելի վերև կբարձրանա, քարը ձեր գլխին կընկնի»: