Լուկաշենկոն Սի Ծինփինին Բելառուս է հրավիրել

Բելառուսի նախագահ Ալեքսանդր Լուկաշենկոն Չինաստանի նախագահ Սի Ծինփինին հրավիրել է այցելել հանրապետություն։

«Հրավիրում եմ Բելառուսի Հանրապետություն, որտեղ Ձեզ ճանաչում և գնահատում են՝ որպես իսկական բարեկամ, և որտեղ ձեզ կընդունեն ամենաջերմ կերպով»,- ասվում է Լուկաշենկոյի՝ Սի Ծինփինին Լուսնային Նոր տարվա տոնի կապակցությամբ հղված շնորհավորանքում։ Տեքստը ներկայացնում է Բելառուսի նախագահի մամուլի ծառայությունը շաբաթ օրը։

Լուկաշենկոն նշել է, որ «անցնող տարին նշանավորվել է Չինաստանի Ժողովրդական Հանրապետության ակնառու ձեռքբերումներով և արժանի հաղթանակներով ինչպես երկրի ներսում, այնպես էլ միջազգային ասպարեզում»։

Նրա խոսքով, Մինսկը և Պեկինը «համատեղ ջանքերով կարողացան զգալի հաջողությունների հասնել բելառուսաչինական համագործակցության ամրապնդման գործում»:

«Վստահեցնում եմ ձեզ իմ պատրաստակամությունը՝ շարունակելու զարգացնել բելառուսաչինական հարաբերությունների ողջ շրջանակը, խորացնել համագործակցությունը միջազգային ասպարեզում՝ արդար և խաղաղ գլոբալ կարգեր կառուցելու համար», - ասել է Բելառուսի նախագահը։