«Այրվելու եք դժոխքում, դևե՛ր». Կադիրովն արձագանքել է Ստոկհոլմում Թուրքիայի դեսպանատան դիմաց Ղուրանն այրելուն

Ակցիան, որի ժամանակ Ստոկհոլմում այրել են Ղուրանը, «ստոր արարք է», իսկ դրա հեղինակը «տականք» է և «դժոխքի ծնունդ», - ասել է Չեչնիայի ղեկավար Ռամզան Կադիրովը։ Նա վստահ է, որ ակցիայի համար վճարել են շվեդական իշխանությունները, և դրա կազմակերպիչներին հավիտենական անեծք է խոստացել։ Ղուրանը այրելով՝ ցուցարարները բողոքել էին Թուրքիայի գործողությունների դեմ, որոնք խանգարում են Շվեդիային անդամակցել ՆԱՏՕ-ին։
Չեչնիայի ղեկավար Ռամզան Կադիրովն արձագանքել է շվեդական Ստոկհոլմում տեղի ունեցած ակցիային, որի ժամանակ ծայրահեղ աջ քաղաքական գործիչ Ռասմուս Փալուդանը այրել է Ղուրանը Թուրքիայի դեսպանատան դիմաց։

Չեչնիայի ղեկավարը Փալուդանին անվանել է «տականք» և «դժոխքի ծնունդ», ինչպես նաև վստահություն է հայտնել, որ ակցիան ոչ միայն համաձայնեցված է եղել շվեդական իշխանությունների հետ, այլև վճարվել է նրանց կողմից։

«Ամեն դեպքում, բոլորը կհնձեն հենց այն, ինչ ցանել են, և այս ստոր արարքի մեջ ներգրավված բոլոր անձինք կկրեն հավերժական անեծք: Նրանք դա մի օր կհասկանան, բայց արդեն ուշ կլինի։ Այրվելու եք դժոխքում, դևե՛ր», - հավելել է Կադիրովը։

Նրա խոսքով՝ ՆԱՏՕ-ի հետ կապված ամեն ինչ «անաստվածություն» է, իսկ դաշինքի քաղաքականությունը հագեցած է «անհավատությամբ ու անառակության ու չար ոգիների պաշտամունքի տարածմամբ»։