ՆԱՏՕ-ն իրավունք ունի. Ստոլտենբերգ

Բրյուսելում ՆԱՏՕ-ի կենտրոնակայանում Կիևին ռազմական մատակարարումների վերաբերյալ որոշումներ կայացնելը չի ​​նշանակում դաշինքի երկրների ներգրավվածություն ուկրաինական հակամարտության մեջ, հայտարարել է կազմակերպության գլխավոր քարտուղար Յենս Ստոլտենբերգը, գրում են միջազգային ԶԼՄ-ները։

«Ո՛չ ՆԱՏՕ-ն, ո՛չ էլ դաշինքի անդամները հակամարտության կողմերից չեն: Մենք աջակցում ենք Ուկրաինային: Ուկրաինան պաշտպանում է ինքն իրեն։ Մենք իրավունք ունենք օգնել Ուկրաինային իրացնել ինքնապաշտպանության իրավունքը»,- պատասխանել է նա:

Նրա խոսքով, ՆԱՏՕ-ի երկրների կողմից Ուկրաինային տրամադրվող օգնությունը փոխվում է հակամարտության էվոլյուցիայի համաձայն։ «Սկզբում շատ կարևոր էր Javelin թեթև հակատանկային զինատեսակների մատակարարումը, այնուհետև մենք անհրաժեշտ համարեցինք հրետանու մատակարարումը, իսկ հետո ավելի առաջադեմ Patriot հակաօդային պաշտպանության համակարգեր և այլն», - պարզաբանել է գլխավոր քարտուղարը։
Ստոլտենբերգը հիշեցրել է, որ վերջին շաբաթներին ՆԱՏՕ-ի երկրները պայմանավորվել են զրահատեխնիկայի, այդ թվում՝ տանկերի մատակարարման շուրջ։ «Մենք պետք է վստահ լինենք, որ Ուկրաինայի ստացած զենքը թույլ կտա վերադարձնել տարածքները, ազատագրել դրանք»,-ասել է նա։