Վրաստանը չի խաղա ուրիշի կանոններով՝ ԵՄ թեկնածուի կարգավիճակ ստանալու համար․ Կալաձե

Վրաստանի իշխանությունները եվրաինտեգրման ճանապարհին կխաղան «վրացական կանոններով», հայտարարել է իշխող «Վրացական երազանք - դեմոկրատական ​​Վրաստան» կուսակցության գլխավոր քարտուղար, Թբիլիսիի քաղաքապետ Կախա Կալաձեն, հայտնում է վրացական «Առաջին ալիքը»։ Այսպես է նա արձագանքել Եվրախորհրդարանի պատգամավոր Անդրիուս Կուբիլիուսի այն խոսքերին, թե երկիրը չի ստանա Եվրամիությանն անդամակցելու թեկնածուի կարգավիճակ, եթե չխաղա «մեր կանոններով»։

«Սա խաղի և շանտաժի մի մասն է, որը մենք տեսնում ենք այս ամբողջ ընթացքում, և դա տեսնում է նաև հանրությունը։ Վրաստանի իշխանությունները կխաղան վրացական կանոններով, գործելու են երկրի շահերից ելնելով և մեր ժողովրդի ազգային շահերից ելնելով։ Մեր կառավարությունն ամեն ինչ արել և անում է այս դժվարին ճանապարհին։ Սակայն եթե նրանց կողմից թեկնածուի կարգավիճակ տալու մերժման քաղաքական որոշում կայացվի, նրանք մեզ չեն տա այդ կարգավիճակը, ուրեմն թող իրենց պահեն»,- ասել է Կալաձեն։

Նա նաև հավելել է, որ շատերի համար Վրաստանի իշխանություններն անընդունելի են, քանի որ իրենք ամեն ինչ անում են երկրի ժողովրդի շահերը ռեալիզացնելու համար և հրաժարվում են մտնել Ուկրաինայում հակամարտության մեջ։