Պուտինը հանդես կգա ուղերձով

Ռուսաստանի նախագահի մամուլի քարտուղար Դմիտրի Պեսկովը հայտնել է, որ ՌԴ նախագահ Վլադիմիր Պուտինը Դաշնային ժողովին ուղղված ուղերձում հատուկ ուշադրություն կդարձնի Ուկրաինայում հատուկ ռազմական գործողության  թեմային։ Այս մասին նա ասել է «Ռոսիա 1» հեռուստաալիքի եթերում։

Պեսկովի խոսքով՝ Ռուսաստանում ողջ կյանքը «պտտվում է հատուկ ռազմական գործողության թեմայի շուրջ»։

«Եվ հատուկ ռազմական գործողությունն այս կամ այն ​​կերպ ազդում է մեր ողջ կյանքի վրա, ազդում է մայրցամաքում կյանքի վրա: Ուստի, իհարկե, պետք է սպասել, որ նախագահը մեծ ուշադրություն կդարձնի դրան (ուղերձում - խմբ․)»,- ասել է Պեսկովը:

Կրեմլի խոսնակը նաև նշել է, որ Արևմուտքը դեռևս պատրաստակամություն չի ցուցաբերել Ուկրաինայի իրավիճակի վերաբերյալ խաղաղ նախաձեռնությունների համար։

ՌԴ նախագահի ուղերձը Դաշնային ժողովին կկայանա փետրվարի 21-ին։ Մամուլի քարտուղարի խոսքով՝ հյուրերի ավանդական կատեգորիաներից բացի կհրավիրվեն հատուկ ռազմական գործողության մասնակիցներ։ Ռուսական հեռուստաալիքները փետրվարի 21-ին ժամը 12:00-ին (Մոսկվայի ժամանակով) կցուցադրեն ՌԴ նախագահի ուղերձը։ Ծրագրի ուղեցույցի համաձայն՝ ՌԴ նախագահի ելույթը կտևի մեկ ժամ։