Կիմ Չեն Ընի քույրը ԱՄՆ-ին սպառնացել է հրթիռներով

Հյուսիսային Կորեան երկուշաբթի օրը՝ փետրվարի 20-ին, երկու բալիստիկ հրթիռ է արձակել Կորեական թերակղզու արևելյան ափի ջրերի վրա։ Հյուսիսային Կորեայի առաջնորդ Կիմ Չեն Ընի քույրը սպառնացել է ավելի շատ հրթիռներ ուղարկել, եթե ԱՄՆ-ն չդադարեցնի զորավարժությունները Հարավային Կորեայի հետ։

CNN-ի փոխանցմամբ՝ հյուսիսկորեացի բարձրաստիճան պաշտոնյա Կիմ Յո Չժոնն ասել է, որ «Խաղաղ օվկիանոսը որպես ուսումնադաշտ օգտագործելու հաճախականությունը կախված է ԱՄՆ զինվորականների գործողությունների բնույթից»։

Հարկ է նշել, որ այսօրվա հրթիռի փորձարկումը երկրորդն էր երեք օրվա ընթացքում. շաբաթ օրը Փհենյանը միջմայրցամաքային բալիստիկ հրթիռ է արձակել՝ երրորդ նման փորձարկումը մեկ տարուց պակաս ժամանակահատվածում։

Իր հերթին, ԱՄՆ-ն կիրակի օրը՝ փետրվարի 19-ին, առանձին վարժանքներ է անցկացրել Հարավային Կորեայի և Ճապոնիայի հետ, ինչը Հյուսիսային Կորեան համարել է սադրանք։ Ակնկալվում է, որ հաջորդ ամիս դաշնակիցները զորավարժություններ կանցկացնեն Կորեական թերակղզում։

Ուրբաթ օրը Հյուսիսային Կորեան նախազգուշացրել է զորավարժություններին «աննախադեպ դաժան պատասխանի» մասին, եթե դրանք շարունակվեն:

Ճապոնիայի պաշտպանության նախարարությունը գնահատել է, որ հյուսիսկորեական երկու հրթիռներն էլ արձակվել են երկուշաբթի օրը՝ տեղական ժամանակով ժամը 7:00-ի սահմաններում, և ընկել Ճապոնական ծովը՝ «Կորեական թերակղզուց արևելք, Ճապոնիայի բացառիկ տնտեսական գոտուց դուրս»։

Հյուսիսային Կորեան այս արձակումներն անվանել է «գերխոշոր բազմակի հրթիռային համակարգերի վարժանքներ, որոնք մարտավարական միջուկային հարձակման միջոց են»։