28 աշակերտուհիներ հոսպիտալացվել են «հոգի կանչելուց» հետո

28 աշակերտուհիներ հոսպիտալացվել են միաժամանակ ուշագնաց լինելուց հետո: Ինչպես նշում է New York Post-ը, մինչ հանկարծակի հոսպիտալացումը, աղջիկները ոգեհմայության սեանս են անցկացրել «Ուիջա» տախտակի հետ։

Կոլումբիայի Գալերաս քաղաքի դպրոցի աշակերտները հոսպիտալացվել են այն բանից հետո, երբ միաժամանակ կորցրել են գիտակցությունը։ Բժիշկները նաև նշել են գլխապտույտը և անհանգստությունը որպես ախտանիշներ: Դա տեղի է ունեցել այն բանից հետո, երբ աղջիկները դասերից մեկի ժամանակ ոգեհմայության սեանս են անցկացրել: Աշակերտներին հիվանդանոց են տեղափոխել անհանգստացած ուսուցիչների ու դպրոցի տնօրենի ուղեկցությամբ։

Դեպքի մասին տեղեկացվել են երեխաների ծնողները։ Դպրոցի տնօրեն Ուգո Տորեսը խնդրել է քաղաքաբնակներին զերծ մնալ էմոցիոնալ մեկնաբանություններից՝ քաղաքում խուճապը չսրելու համար, և ասել է, որ հասկանում է տեղի ունեցածի պատճառները։ Ներկայումս ուսումնական հաստատությունը բժիշկներից սպասում է թեստերի արդյունքներին և վերջնական ախտորոշմանը։

Չնայած տնօրենի կոչին, Գալերասի անհանգստացած բնակիչներն ահազանգում են։ Ոմանք պնդում են, որ նման դեպքերը հազվադեպ չեն, և մի քանի օրը մեկ ուշագնաց եղած երեխաներ են բերում հիվանդանոց, չնայած այն հանգամանքին, որ քաղաքում սովի կամ հյուծվածության խնդիր չկա։

Առայժմ հայտնի չէ, թե արդյոք ոստիկանությունը կանցկացնի միջադեպի սեփական հետաքննությունը։