«Արգիշտի Քյարամյանն ասում է՝ բերում եմ, որ էդպիսի օրենք չկա, ո՞նց ես բերում». Վարդան Ղուկասյանը՝ իրեն էքստրադիցիայի ենթարկելու մասին

«Քննչական կոմիտեի տարածած նամակագրությունների սքրինշոթերն ինձ հետ կապ չունեն։ Ես նախաքննական մարմնի փոխարեն գնացել եմ հեռախոսահամարների հետքերով և պարզել, թե ում են դրանք պատկանում»: Այս մասին ԼՈՒՐԵՐ.com-ի հետ զրույցում ասաց «Հանրային ձայն» կուսակցության ղեկավար Վարդան Ղուկասյանը՝ մեկնաբանելով երեկ Քննչական կոմիտեի տարածած հաղորդագրությունը, ըստ որի՝ նրա նկատմամբ հանրային հետախուզում է հայտարարվել, և իրեն ՀՀ-ին փոխանցելու միջոցներ են ձեռնարկվել, քանի որ հարուցված քրեական գործով փաստական ապացույցներ կան:

Վարդան Ղուկասյանի խոսքով՝ ինքն է  խնդրել, որ դատարանը նամակագրությունների սքրինշոթերը փոխանցի իրեն, այնուհետև առաջինը ինքն է տարածել իր հանրային հարթակներում. «Դատարանի կողմից ինձ ուղարկված սքրինշոթերը ինձ համար խիստ նորություն էին, քանի որ հեռախոսահամարները, որոնցով նամակագրություն է եղել, ինձ հետ որևէ առնչություն չունեն: Դատարանը դա ընդունել է՝ որպես իրեղեն ապացույց, նախաքննական մարմնից չի պահանջել պարզել՝ արդյո՞ք դրանք Վարդան Ղուկասյանին են պատկանում, կամ նա օգտվե՞լ է դրանից։ Արդյո՞ք հարցում արվել է Ռուսաստանից՝ պարզելու՝ ում անունով են դրանք գրանցված, թե՞ ոչ: Ես իմ կապերով և ծրագրով, որը հնարավորություն է տալիս տեսնելու՝ ինչ անունով է այն գրանցված այլ հեռախոսներում, պարզել եմ՝ ում են դրանք պատկանում։ Պարզվեց՝ ֆիքսված է ոմն Արամի անուն: Մինչ ՔԿ-ն կհայտարարեր դրա մասին, հեռախոսահամարների տերերի անուններով, գրանցված հասցեներով ուղարկել եմ ՔԿ, որ գնան ՌԴ և իրավապահների հետ համագործակցելով՝ պարզեն՝ ով են և որ ինձ հետ կապ չունեն: Եթե Տիգրան Արզաքանցյանն ինչ-որ մեկին 2000 դոլար է փոխանցել, ում անունով է փոխացել, թող գնան գտնեն տվյալ անձին: Այն, ինչ պետք է անի նախաքննական մարմինը, անում եմ ես՝ փորձելով ապացուցել իմ անմեղությունը»,- ասաց Ղուկասյանը՝ նշելով, որ երեկ դիմել է ՌԴ իրավապահ մարմիններին, որպեսզի գտնեն անձանց, որոնց պատկանում են հեռախոսահամարները: 

Նա վստահեցրեց, որ ինքը Տիգրան Արզաքանցյանի հետ երբևէ նամակագրություն չի ունեցել և չի բացառում, որ ինչ-որ մեկը ՌԴ-ից իր անվան տակ Տիգրան Արզաքանցյանի հետ վարել է նամակագրություն՝ օգտագործելով իր լեքսիկոնից որոշ բառեր. «Նամակագրություն վարողը կորզել է 2000, թե 5000 դոլար յութուբյան ալիքից Տիգրան Արզաքանցյանի վերաբերյալ տեսանյութ հեռացնելու համար: Իմ յութուբյան ալիքից երբևիցե ոչինչ չի հեռացվել մինչ այն պահը, երբ իմ յութուբյան ալիքը փակվեց ՀՀ իշխանությունների ջանքերով: Թե ում, որքան գումար է փոխանցվել, նախաքննական մարմինը պետք է հետքով գնար, հասներ Ռուսաստան, բայց չգիտեմ՝ ինչու չի գնացել»,- նշեց նա:

Վարդան Ղուկասյանը բացատրեց՝ որքանով է իրատեսական իրեն ՀՀ-ին փոխանցելու ՔԿ-ի ջանքերը՝ ընդգծելով, որ ՔԿ-ն էքստրադիցիայի հայտարարությամբ փորձեց խաղալ հանրության գիտակցության հետ. «Եթե վերցնենք, որ Արգիշտի Քյարամյանն իմ գտնվելու վայրը ֆիքսել է Միացյալ նահանգները, ապա առաջինը՝ ՀՀ-ի և ԱՄՆ-ի միջև էքստրադիցիայի պայմանագիր գոյություն չունի: Երկրորդ՝ Վարդան Ղուկասյանն ունի ՌԴ-ի անձնագիր, երրորդ՝ ՀՀ-ում հարուցված գործը պետք է քննվի այն երկրում, որտեղից պետք է անձը լինի էքստրադիցիա: Չորրորդ՝ գործը հարուցվել է մեկ մարդու ցուցմունքով՝ առանց ապացուցողական բազայի: Դուք մարդասպաններին, փողերի լվացման մեջ մեղադրվողներին, լուրջ հանցագործներին էքստրադիցիա չեք կարողանում անել անգամ ՌԴ-ից, էս ի՞նչ եք հայտարարում: Արգիշտի Քյարամյանն ասում է՝ բերում եմ։ Որ  էդպիսի օրենք չկա, ո՞նց ես բերում: Ինֆորմացիան այն տիպի էին տարածել, ոնց որ ինքնաթիռը կանգնած է հիմա, Վարդան Ղուկասյանը նստում է ու գա Հայաստան»,- եզրափակեց Վարդան Ղուկասյանը:

Մեկնաբանություն ստանալու համար փորձեցինք կապ հաստատել նաև Տիգրան Արզաքանցյանի հետ, բայց մեր զանգերն անպատասխան մնացին: Պատրատ ենք նաև հրապարակել նրա տեսակետը: