Զույգը ռեստորանում ընթրիքի ժամանակ մարգարիտ է գտել և զարդարել դրանով նշանադրության մատանին

ԱՄՆ Ռոդ Այլենդ նահանգից զույգը ռեստորանում ընթրիքի ժամանակ ոստրեի մեջ մարգարիտ է գտել և դրանով զարդարել իրենց նշանադրության մատանին։ Այս մասին հայտնում է UPI-ն։

2021 թվականի դեկտեմբերին Սենդի Սիկորսկին և Քեն Սթեյնքամպը ընթրելիս են եղել The Bridge Restaurant and Raw Bar ռեստորանում։ Նրանց հետ են եղել կնոջ եղբայրն ու վերջինիս կինը։ Ընթրիքի ժամանակ Սիկորսկին սկսել է ուտել մատուցված ոստրեներից վերջինը և ինչ-որ կլոր բան է զգացել իր բերանում։

«Մտածեցի՝ սա ի՞նչ է, գրողը տանի։ Բերանիցս հանեցի այն և դրեցի սեղանին։ Հարսս հարցրեց. «Սա ատա՞մ է»», - պատմել է կինը: Շուտով Սիկորսկու հարսը, ով սիրում է զարդեր, ենթադրել է, որ դա 9,8 միլիմետր չափի մարգարիտ է։

Black Orchid Jewelers-ի մասնագետ Մարկ Ֆիշբոնը հետազոտել է գտածոն և հաստատել ենթադրությունը։ Ֆիշբոնը նշել է, որ հաշվի առնելով մարգարտի քաշը և չափը, դրա ձևավորումը կարող էր տևել մոտ 50 տարի:

Սիկորսկին և Սթայնքամպը որոշել էին, որ եթե երբևէ որոշեն ամուսնանալ, ապա այս մարգարիտից նշանադրության մատանի կպատրաստեն։ Նրանց ծրագիրն իրականացավ․ հուլիսի 8-ին տղամարդն ամուսնության առաջարկ է արել սիրելիին։ Նա կնոջը նվիրել է մատանի՝ զարդարված այդ նույն մարգարիտով։

Զույգը նշանադրությունը նշել է նույն ռեստորանում։ Նրանք պատմել են իրենց պատմությունը հաստատության սեփականատիրոջը, ով շատ ուրախ էր, որ դա պատահել է իր մշտական ​​հաճախորդների հետ: Ռեստորանը սոցցանցերում հրապարակել է մարգարտի ու մատանու լուսանկարները։