Դանիայի արտգործնախարարը ներողություն է խնդրել ալժիրցի գործընկերոջից Ղուրանի այրմամբ ակցիայի պատճառով

Դանիայի արտաքին գործերի նախարար Լարս Լոկե Ռասմուսենը Ալժիրի արտգործնախարար Ահմեդ Աթթաֆի հետ հեռախոսազրույցի ընթացքում ներողություն է խնդրել Կոպենհագենում մահմեդական երկրների դեսպանատների շենքերի դիմաց Ղուրանի օրինակների այրման հետ կապված գործողությունների կապակցությամբ։ Այս մասին հայտնում է ՏԱՍՍ-ը։

«Դանիական դիվանագիտության ղեկավարը դատապարտել է այդ գործողությունները, որոնք հակասում են դանիական հասարակության հյուրընկալության, բաց լինելու և հանդուրժողականության ավանդույթներին», - ասվում է Ալժիրի արտաքին գործերի նախարարության հաղորդագրության մեջ։

Ռասմուսենը Ալժիրի ԱԳՆ-ին տեղեկացրել է, որ Դանիայի կառավարությունը վերջնական փոփոխություններ է կատարում օրենքում՝ ուղղված սուրբ գրքի այրման պրակտիկայի դադարեցմանը։

Հուլիսի վերջին «Դանիական հայրենասերներ» ծայրահեղ աջ խմբավորման անդամներն այրել էին Ղուրանը մի քանի մահմեդական երկրների, այդ թվում՝ Ալժիրի դեսպանատների առջև։