Մենք վերջ դրեցինք Արևմուտքի ռազմական գերակայությանը. Շոյգու

Մենք Ուկրաինայում «հատուկ օպերացիայով» վերջ դրեցինք կոլեկտիվ Արևմուտքի գերակայությանը ռազմական ոլորտում, իր շահերն աշխարհին պարտադրելու նրա կարողությունը զգալիորեն կրճատվեց, հայտարարել է ՌԴ պաշտպանության նախարար, բանակի գեներալ Սերգեյ Շոյգուն Միջազգային անվտանգության մոսկովյան XI համաժողովում, գրում է Ռիա Նովոստին։

«Հատուկ ռազմական գործողությունը վերջ դրեց կոլեկտիվ Արևմուտքի գերակայությանը ռազմական ոլորտում։ Նրա կարողությունը՝ իր շահերը պարտադրելու աշխարհի տարբեր տարածաշրջաններում, զգալիորեն կրճատվել է։ Շարունակվող փոփոխությունները մեծացրել են Ասիայի երկրների, Աֆրիկայի ​​և Լատինական Ամերիկայի դերը ​​համաշխարհային համակարգում, այդ թվում՝ բնական ռեսուրսների օգտագործումը պետությունների ինքնիշխան զարգացման համար»,- ասել է Շոյգուն։

Նախարարը նշել է, որ «հատուկ գործողության ընթացքում» ռուսական բանակը հերքել է արևմտյան ռազմական չափանիշների գերազանցության մասին բազմաթիվ առասպելներ։ «Ակնհայտ է դարձել, որ արևմտյան զենքի կիրառումը, ՆԱՏՕ-ի գործողությունների պլանավորման առաջադեմ մեթոդները, զորքերի հրամանատարության և վերահսկման մեթոդները և դրանց վարժեցումը չեն կարող գերակայություն ապահովել մարտի դաշտում», - ասել է Շոյգուն։