Թուրքիայում խոշոր անտառային հրդեհ է բռնկվել․ Դարդանելի նեղուցը փակվել է (տեսանյութ)

Թուրքիայի հյուսիս-արևմուտքում՝ Չանաքքալե նահանգում, խոշոր անտառային հրդեհ է սկսվել։ Ինչպես հայտնում է TRT հեռուստաալիքը, իշխանությունները տարհանել են հրդեհի գոտու մերձակայքում գտնվող գյուղերից մեկի բնակիչներին։

Հրդեհի պատճառը դեռևս հայտնի չէ։ Սակայն հրդեհի արագ տարածման վտանգ կա։ Մարման աշխատանքներին ներգրավված են հրշեջ ուղղաթիռներ ու ինքնաթիռներ, ինչպես նաև մեծ թվով հրշեջներ։

Իշխանությունները ժամանակավորապես փակել են Չան և Չանաքքալե քաղաքների միջև մայրուղին։ 

Հրդեհի հետևանքով զոհերի կամ տուժածների մասին տեղեկություններ դեռ չկան։ Հրդեհի հետևանքով տուժել են մի քանի կենդանիներ։ Տեղի բնակիչները փորձում են իշխանությունների օգնությամբ խոշոր և մանր եղջերավոր անասուններին տեղափոխել անվտանգ տարածքներ։

Անտառային հրդեհի պատճառով Դարդանելի նեղուցը փակ է հարավից դեպի հյուսիս նավերի անցման համար, հաղորդում է TRT Haber–ը։

«Շարունակվող անտառային հրդեհի պատճառով Դարդանելի նեղուցը փակվել է հարավից դեպի հյուսիս նավերի անցման համար»,- նշում է հեռուստաալիքը։