Հայ-ռուսական դաշնակցային հարաբերությունների այլընտրանքն է՝ Հայաստանի մուտքը Թուրքիա․ Էդուարդ Շարմազանով

«Հայ-ռուսական դաշնակցային հարաբերությունների այլընտրանքն է՝  Հայաստանի մուտքը թուրքական աշխարհ, այլ բան չկա։ Հայ-ռուսական հարաբերությունների թուլացումը, Ռուսաստանի նկատմամբ թշնամական քարոզչությունը, ուղիղ, կենսականորեն վնաս է հայ ժողովրդին և ՀՀ անվտանգային շահին»,- ԼՈՒՐԵՐ.com-ի հետ զրույցում ՀՀԿ ԳՄ անդամ Էդուարդ Շարմազանովն այս տեսակետը հայտնեց՝ անդրադառնալով հայ-ռուսական հարաբերություններում տեղի ունեցող իրադարձություններին։  

«Ինձ անհանգստացնում է՝ հայ-ռուսական հարաբերությունների փոխհրաձգությունը, որը կազմակերպում է Նիկոլ Փաշինյանի իշխանությունը, ինչը  վտանգավոր է։ Այս ամենը կարող է բերել նրան, որ Աստված մի արասցե  պատերազմ լինի, այդ դեպքում Հայաստանը կմնա մենակ։ ԵՄ դիտորդներն են փրկելո՞ւ, դե թող ԵՄ դիտորդները չթողնեին՝ Սոթքում կրակել, թող ԵՄ դիտորդները կամ Արևմուտքը  հեռացնեին Ադրբեջանին։  Նիկոլ Փաշինյանը և իր թիմը  վերջին օրերին ավելի շատ խոսում են Ռուսաստանի դեմ, քան Թուրքիայի։ Այս ամենը ուղղակի հանցագործություն է սեփական ժողովրդի նկատմամբ»,-ասաց նա 

Մեր զրուցակցի խոսքով՝  Հայաստանը այն Ուկրաինային է հումանիտար օգնություն  ուղարկում, որի ֆոսֆորային զենքով սպանում էին մեր երեխաներին, այն Ուկրաինաին, որի նախագահը Ալիևին համարում է իր սիրելին․ 

«Աշխարհաքաղաքական և դիվանագիտական ճանապարհով Նիկոլ Փաշինյանը մսխել է ամեն ինչ։ Նա միակ ղեկավարն է, ում  օրոք Հայաստանի տարածքը օկուպացված է,  իսկ իրենք նստած բուկլետ են բաժանում և խոսում ազգային անվտանգությունից։ Իրենք ազգային անվտանգության հետ այնքան կապ ունեն, ինչքան էշը տուռնիկի: Իրենք  ինչ գիտեն ինչ է անվտանգությունը, պետությունը, անկախությունը, իրենք կարող են լավ թուրքերի կոշիկները մաքրել, որը անում են մեծ սիրով»,-ասաց Շարմազանովը:

Շարմազանովը նշեց, որ Փաշինյանը, բացի գերիներից և զոհերից ոչինչ չի բերել հայաստանին. 

«Արցախ և  Հայաստան ունենալու համար պետք է դրանց հանել իշխանությունից, կանենք կունենանք նորմալ պետություն, չենք անի ուրեմն իրենց հետ կապրենք թուրքական վիլայեթում, բայց ես գտնում եմ, որ Հայաստանում կան ակտիվ քաղաքացիներ, որոնք ճիշտ ժամանակին, ճիշտ տեղում, ճիշտ օրը կհեռացնեն այս իշխանություններին,  և նա տարբերակ չունի չգնալու։ Սրանք պրոթուրքական իշխանություն են»,- խոսքը եզրափակեց Շարմազանովը: 

Լիլիթ Զալիբեկյան