ՄԱԿ-ի գլխավոր քարտուղարը դեմ է արտահայտվել պաղեստինցիների կոլեկտիվ պատժին

ՀԱՄԱՍ-ի գործունեությունը, ներառյալ հոկտեմբերի 7-ին Իսրայելի տարածքի վրա հարձակումը, չեն կարող պաղեստինցիների կոլեկտիվ պատժի պատճառ հանդիսանալ։ Այս մասին ՄԱԿ-ի գլխավոր քարտուղար Անտոնիո Գուտերեշը հայտարարել է Մերձավոր Արևելքում հակամարտության կարգավորման Կահիրեի գագաթնաժողովի ժամանակ, փոխանցում է ՌԻԱ Նովոստին։

Նրա խոսքով, միջազգային հանրությունն այլեւս չի կարող անտեսել տարածաշրջանում առկա իրադարձությունների ավելի լայն համատեքստը։ Խոսքը, մասնավորապես, տեւական հակամարտության եւ 56 տարվա օկուպացիայի մասին է։

Կազմակերպության ղեկավարը նաև ընդգծել է, որ ոչ մի պատճառ չի կարող արդարացնել ՀԱՄԱՍ-ի հարձակումն Իսրայելի վրա։ Սակայն տեղի ունեցածը չպետք է պատճառ հանդիսանա ողջ պաղեստինցի ժողովրդին պատժելու համար, ասել է Գուտերեշը։

Ինչպես ասել է ՄԱԿ-ի գլխավոր քարտուղարը, նույնիսկ նման իրավիճակում անհրաժեշտ է պահպանել միջազգային մարդասիրական իրավունքի նորմերը։ Նույնը վերաբերում է 1949 թվականին ընդունված Ժնևի կոնվենցիայի դրույթներին։