Վրաստանում ձերբակալվել է իտալական մաֆիայի առաջնորդներից մեկը

Վրաստանում իրավապահները ձերբակալել են իտալական մաֆիայի առաջնորդներից մեկին՝ Ջուզեպպե Սգանգային։ Այս մասին հայտնում է վրացական Ռուսթավի 2 հեռուստաալիքը։

Իտալիայում 67-ամյա Սգանգան 2020 թվականին հեռակա դատապարտվել է 11 տարվա ազատազրկման և գտնվում էր միջազգային հետախուզման մեջ։ Նա մեղադրվում էր Թուրինում տարբեր հանցավոր գործունեության համար պատասխանատու մաֆիոզ խմբի գործունեությանը մասնակցելու մեջ։

Սգանգայի ձերբակալման մասին տեղեկությունը հաստատել է նաև Վրաստանի գլխավոր դատախազ Իրակլի Շոթաձեն։ Նրա խոսքով՝ ներկայումս ընթանում է արտահանձնման ընթացակարգը։

Տարեսկզբին հաղորդվում էր, որ իտալական ոստիկանությունը ձերբակալել է սիցիլիական Cosa Nostra մաֆիայի ամենափնտրվող բոսին՝ Մատեո Մեսինա Դենարոյին։ Հանցագործը իրավապահներից թաքնվում էր 30 տարի՝ 1993 թվականի ամառվանից։