ՀԱՄԱՍ-ը հայտարարել է Իսրայելի հետ «լիարժեք փոխզիջման» պատրաստակամության մասին

Պաղեստինյան արմատական ​​ՀԱՄԱՍ շարժման քաղբյուրոյի անդամ Ղազի Համադը հայտարարել է, որ կազմակերպությունը պատրաստ է «լիարժեք փոխզիջման» Իսրայելի իշխանությունների հետ գերիների փոխանակման հարցում։ Նա նաև հայտարարել է, որ ՀԱՄԱՍ-ը պատրաստ է բանակցել քաղաքացիական պատանդներին գերությունից ազատելու շուրջ։
Ղազի Համադի խոսքով՝ ՀԱՄԱՍ-ը պատրաստ է ռազմագերիներին փոխանակել իսրայելական բանտերում շարժման ներկայացուցիչների հետ, այլ տարբերակներ չեն դիտարկվում, գրում է Kommersant-ը։

«Մենք ուզում ենք, որ այս մարդիկ վերադառնան տուն։ Բացի այդ, մենք ուզում ենք, որ մեր գերիները հիմա տուն գնան։ Հետևաբար, ես կարծում եմ, որ այժմ մենք պատրաստ ենք ամբողջական փոխզիջման, բոլոր պատանդներին՝ և՛ զինվորականներին, և՛ քաղաքացիական անձանց ազատ արձակելու համաձայնագրի կնքմանը, ինչպես նաև Իսրայելի կալանավայրերից բոլոր բանտարկյալներին ազատելուն»,- ասել է Համադը ամերիկյան NBC News հեռուստաալիքին տված հարցազրույցում։ ՀԱՄԱՍ-ի ներկայացուցիչը քաղաքացիական պատանդների ազատ արձակման պայման է անվանել Գազայի հատվածում Իսրայելի ցամաքային ռազմական գործողությունների դադարեցումը։