Իսրայելում կասկածում են, որ ԶԼՄ–ները կարող էին նախապես տեղյակ լինել հոկտեմբերի 7-ի հարձակման մասին

CNN-ի, Reuters-ի, Associated Press-ի և The New York Times-ի իսրայելական բյուրոների ղեկավարները պետք է բացատրություն տան հոկտեմբերի 7-ի հարձակման ժամանակ պաղեստինյան ՀԱՄԱՍ շարժման անդամների մոտ իրենց լրագրողների ներկայության համար։ Այս մասին հայտնում է Իսրայելի կառավարության մամուլի գրասենյակի (GPO) կայքը։

Հայտարարության մեջ նշվում է, որ համակարգող մարմնի ղեկավար Նիցան Չենը հրատապ նամակ է ուղարկել տարածաշրջանային մեդիա բյուրոների ղեկավարներին։ Դիմումի պատճառ է դարձել Honest Reporting կազմակերպության հրապարակումը, ըստ որի՝ այս ԶԼՄ–ների ֆոտոլրագրողները կարող էին նախապես տեղյակ լինել հոկտեմբերի սկզբին Իսրայելի վրա ՀԱՄԱՍ-ի հարձակման մասին։

«GPO-ի տնօրեն Նիցան Չենը պարզաբանում է պահանջել AP-ի, Reuters-ի, CNN-ի և NYT-ի բյուրոների ղեկավարներից հոկտեմբերի 7-ի իրադարձություններին իրենց լուսանկարիչների ներգրավվածության հետ կապված տագնապալի եզրակացությունների վերաբերյալ»,- ընդգծվում է հաղորդագրությունում։

Ինչպես պարզաբանել է մամուլի ծառայությունը, մի շարք լրագրողներ «փաստագրել են սարսափները», որոնք իրականացրել են պաղեստինյան ՀԱՄԱՍ շարժման անդամները Իսրայելում։ Միաժամանակ լրատվամիջոցների ներկայացուցիչները շարունակել են իրենց աշխատանքը նույնիսկ այն բանից հետո, երբ շարժման մասնակիցները հատել են երկրի սահմանը։