Հավաքարարը ներկայացել է որպես ատամնաբույժ և հեռացրել պացիենտի առջևի ատամները

Թուրքիայի Ստամբուլ քաղաքի ատամնաբուժարաններից մեկում հավաքարար աշխատող տղամարդը ներկայացել է որպես ատամնաբույժ և առանց բժշկական ցուցումների հեռացրել է պացիենտի առջևի ատամները, հայտնում է Oddity Central-ը։

Ջեմալ Շենասլանը ատամնաբույժ է ձեւացել, երբ պատասխանել է 42-ամյա պացիենտ Հաքան Յըլդըրըմի զանգին։ Տղամարդը բողոքել է ատամի ուժեղ ցավից և ցանկացել է շտապ ատամնաբուժարան այցելել։ Հավաքարարը տղամարդուն հրավիրել է բուժհաստատություն և նույն օրը երեկոյան զննել՝ ներկայանալով որպես մասնագետ։

Արագ զննումից հետո Շենասլանը հայտարարել է, որ անհրաժեշտ է հեռացնել պացիենտի առջեւի չորս ատամը։ Երբ Յըլդըրըմը կասկածել է նման ռադիկալ​​բուժման անհրաժեշտության վերաբերյալ, հավաքարարը զայրացել է և խնդրել իրեն չսովորեցնել՝ ինչպես աշխատել։ Նա նաև նշել է, որ դասավանդում է ատամնաբուժական համալսարանում։

Հավաքարարը պացիենտին համոզել է հեռացնել ատամները՝ պնդելով, որ հետագայում դրանց տեղում իմպլանտներ են տեղադրվելու, և անցել է գործի։ Ցավոտ պրոցեդուրայի համար Շենասլանը պահանջել է իրեն վճարել հազար թուրքական լիրա։ Դրանից հետո հավաքարարը Յըլդըրըմին դեղատոմս է տվել և ուղարկել դեղատուն։ Երբ պացիենտը դեղատոմսը տվել է դեղատան աշխատողին, վերջինս նշել է, որ այն կնիքով հաստատված չէ։

Հաջորդ օրը Յըլդըրըմն սկսել է ուժեղ ցավեր ունենալ և վերադարձել է կլինիկա։ Նա զրուցել է ատամնաբույժներից մեկի հետ ու ասել, որ Շենասլանը հեռացրել է իր ատամները։ Այդ ժամանակ էլ պացիենտը պարզել է, որ տղամարդն իրականում աշխատում է որպես հավաքարար և չունի բժշկական կրթություն։

Յըլդըրըմի վիճակը կտրուկ վատացել է՝ դեմքն ուռել է, աչքերի տակ կապտուկներ են հայտնվել։ Նա հոսպիտալացվել է։ Նշվում է, որ ցավը տանելի է դարձել միայն մեկ ամիս անց։

Շենասլանի դեմ տուժողը հայց է ներկայացրել։ Յըլդըրըմի փաստաբանի խոսքով՝ հավաքարարը նրան թե՛ ֆիզիկական, թե՛ հոգեբանական տրավմա է պատճառել։ Առանց վերապատրաստման ատամնաբուժական ծառայություններ մատուցելու համար հավաքարարը դատապարտվել է 2,5 տարվա ազատազրկման։ Բացի այդ, նրան հանձնարարվել է փոխհատուցում վճարել Յըլդըրըմին պատճառված վնասի համար։