Գազայի հատվածում պատերազմը չի կարող դադարեցվել․ Նեթանյահու

Գազայի հատվածում պատերազմը չի կարող դադարեցվել այնքան ժամանակ, քանի դեռ պաղեստինյան ՀԱՄԱՍ խմբավորումը չի ոչնչացվել և բոլոր պատանդներն ազատ չեն արձակվել։ Այս մասին հայտարարել է Իսրայելի վարչապետ Բենիամին Նեթանյահուն, փոխանցում է ՏԱՍՍ-ը։

Վարչապետի աշխատակազմի կողմից հրապարակված ելույթի տեսանյութում Նեթանյահուն ասել է, որ երեք ամիս առաջ ՀԱՄԱՍ-ը հարձակվեց Իսրայելի վրա, իսկ հետո կառավարությունը հրամայեց Իսրայելի պաշտպանության բանակին պատերազմ սկսել ՀԱՄԱՍ–ին վերացնելու, պատանդներին վերադարձնելու և այնպիսի իրադրություն ապահովելու նպատակով, որ Գազայի հատվածն այլևս վտանգ չներկայացնի երկրի համար:

«Պատերազմը չի կարող դադարեցվել, քանի դեռ չենք հասել այս բոլոր նպատակներին», - մեջբերում է գործակալությունը Նեթանյահուի խոսքերը:

Իսրայելը մտադիր է վերականգնել անվտանգությունը հարավում և հյուսիսում, որտեղ պահպանվում է լարվածությունը Լիբանանի հետ սահմանին, նշել է նա՝ հավելելով, որ մինչ այդ պետք է «ամեն ինչ մի կողմ դնենք և շարունակենք միասին գործել, մինչև հասնենք լիակատար հաղթանակի»։