Գերմանիայում Volkswagen–ի գործարանը դադարեցրել է աշխատանքը գործադուլների պատճառով

Գերմանական Volkswagen ավտոարտադրողի՝ Էմդենում գտնվող գործարաններից մեկը երկուշաբթի օրը՝ հունվարի 8-ին, դադարեցրել է աշխատանքը ֆերմերների գործադուլների պատճառով։ Այս մասին հայտնում է Bild թերթը։

Ցուցարարները փակել են ճանապարհները տրակտորներով, ինչի պատճառով աշխատակիցները չեն կարողացել հասնել իրենց աշխատավայր։ Արտադրությունը կարող է վերսկսվել երեքշաբթի՝ հունվարի 9-ին, գրում է հրատարակությունը։

Ցուցարարները հավաքվել են հունվարի 8-ի վաղ առավոտյան, գրում է Reuters-ը։ Որոշ տրակտորներ և բեռնատարներ կրում էին «Ոչ մի գարեջուր՝ առանց ֆերմերների» գրությամբ պաստառներ և ծայրահեղ աջ «Այլընտրանք Գերմանիայի համար» կուսակցության պաստառներ: Բեռլինում տասնյակ տրակտորներից բաղկացած շարասյունը փակել է դեպի Բրանդենբուրգյան դարպասներ տանող գլխավոր պողոտան։

Ֆերմերները բողոքում են գյուղատնտեսության սուբսիդավորումն աստիճանաբար վերացնելու կառավարության ծրագրերի դեմ: Արտոնությունները ֆերմերներին թույլ են տալիս տարեկան խնայել մոտ 900 միլիոն եվրո (980 միլիոն ԱՄՆ դոլար), իսկ սուբսիդավորումից հրաժարվելը կհանգեցնի զանգվածային սնանկացման։