Իրաքի վարչապետը պահանջել է անհապաղ սկսել ԱՄՆ-ի ու նրա դաշնակիցների ուժերի դուրսբերումը երկրից

Միջազգային կոալիցիան, ԱՄՆ-ի գլխավորությամբ, պետք է հեռանա Իրաքից՝ հանրապետության կայունությունն ու անվտանգությունը պահպանելու համար։ Այս մասին Դավոսում Համաշխարհային տնտեսական ֆորումի ժամանակ հայտարարել է հանրապետության վարչապետ Մոհամմեդ Շիա Սուդանին, հաղորդել է ՏԱՍՍ-ը:

«Մենք ցանկանում ենք անհապաղ սկսել Իրաքում կոալիցիայի ուժերի լուծարման գործընթացը, քանի որ դրանց դուրսբերումն անհրաժեշտ է երկրում անվտանգությունն ու կայունությունը պահպանելու, ինչպես նաև կոալիցիայի անդամ երկրների հետ կառուցողական հարաբերություններ պահպանելու համար»,- ընդգծել է նա։

Վարչապետը նշել է, որ դաշինքի ուժերը մեծ ներդրում են ունեցել ԴԱԻՇ–ի ահաբեկիչների դեմ հաղթանակի գործում, և որ Իրաքը գնահատում է այդ օգնությունը։ Բայց, ըստ նրա, այս ահաբեկչական կազմակերպությունն այլեւս վտանգավոր չէ Իրաքի համար, ուստի կոալիցիայի զինված ուժերի ներկայությունը երկրում անհիմն է։