Չինաստանի գործարաններից մեկում փոշու պայթյունի հետևանքով՝ 8 մարդ է զոհվել

Չինաստանի արևելյան Ցզյանսու նահանգի Չանչժոու քաղաքում շաբաթ վաղ առավոտյան արտադրական արտադրամասում փոշու-օդի խառնուրդ է պայթել: Զոհվել է 8 մարդ, հայտնում է China.org-ը։

Միջադեպը տեղի է ունեցել շաբաթ օրը՝ ժամը 03:38-ին, Changzhou Shenrong մետաղական գիտատեխնիկական ընկերության արտադրամասում: Շրջանի արտակարգ իրավիճակների կառավարման վարչությունից հայտնում են, որ միջադեպի հետևանքով` ևս 8 հոգի թեթև վնասվածքներ է ստացել։

Դեպքի վայրում փրկարարական աշխատանքներն ավարտվել են։ Այս պահին դեպքի հանգամանքները պարզվում են, կատարվում է քննություն։