Ֆրանսիայի դատախազությունը հայտարարել է Օլիմպիական խաղերի ժամանակ երեք ահաբեկչություն կանխելու մասին
Ֆրանսիական հետախուզական ծառայությունները կարողացել են կանխել Օլիմպիական խաղերի ժամանակ ծրագրված երեք ահաբեկչություն, հինգ անձի մեղադրանք է առաջադրվել։ Այս մասին Franceinfo ռադիոկայանի եթերում հայտարարել է Ֆրանսիայի հակաահաբեկչական դատախազության (PNAT) ղեկավար Օլիվյե Քրիստենը։ Գրում է news.am-ը։
«Ձեռնարկված միջոցառումների շնորհիվ խաղերի ընթացքում ոչ մի ահաբեկչություն չի իրականացվել։ Ներկա պահին, մեր կարծիքով․ երեք ահաբեկչություն է կանխվել»,- ասել է նա։
Դատախազը պարզաբանել է, որ մի դեպքում ահաբեկչություն է ծրագրվել Սենտ Էթյենի «Ժոֆրուա Գիշար» մարզադաշտի շրջանում գտնվող ժամանցային հաստատությունում։ Ահաբեկիչների մեկ այլ խումբ հարձակում էր ծրագրել Փարիզում «իսրայելական հաստատությունների» և «Իսրայելի ներկայացուցիչների» վրա, սակայն, ինչպես պարզաբանել է Քրիստենը, խոսքը իսրայելցի մարզիկների մասին չէ։ Ժիրոնդի դեպարտամենտից ևս երկու մարդ, ըստ նրա, հարձակումներ էին ծրագրում 2024 թվականի Օլիմպիական խաղերի ժամանակ, սակայն նա չի նշել, թե կոնկրետ որտեղ և երբ։ Նա նաև հրաժարվել է ահաբեկչություն ճանաչել 2024 թվականի Օլիմպիական խաղերի բացման օրն ամբողջ երկրում սաբոտաժի պատճառով երկաթուղային բազմաթիվ երթուղիների խափանումները:
«Բոլոր նրանք, ովքեր ծրագրում էին հարձակումները, ձերբակալվել են։ Ընդհանուր առմամբ մեղադրանք է առաջադրվել հինգ անձի, որոնցից մեկն անչափահաս է։ Բոլորը կալանավորված են»,- ասել է Քրիստենը:
Մեկնաբանելով երկրում ահաբեկչական սպառնալիքի հետ կապված ընդհանուր իրավիճակը՝ դատախազը նշել է, որ հիմնական սպառնալիքը գալիս է արմատական իսլամիստներից՝ նրանց բաժին է ընկնում 2024 թվականի առաջին կիսամյակում սկսված PNAT-ի բոլոր հետաքննությունների 80%-ը: Միևնույն ժամանակ, հետաքննությունների թիվը երեք անգամ գերազանցում է 2023 թվականի նույն ժամանակահատվածի ցուցանիշները։