Ուսուցիչները պետք է փոխեն իրենց դիտանկյունը. ԿԳՄՍ նախարար

Վարչապետ Նիկոլ Փաշինյանը կառավարության նիստում քննարկման ներկայացրեց Սյունիք կատարած այցի ընթացքում մի ուսուցիչ ատեստավորման գործընթացի հետ կապված դիտարկները: Փաշինյանը հայտնեց, որ ըստ ուսուցչի՝ ատեստավորման նյութի և դասավանդվող բովանդակության կապը թույլ է կամ կապ չկա առհասարակ, քիչ ժամանակ է տրվում ատեստավորմանը, իսկ ցածր գործակցով վճարվող ուսուցիչները նույն չափանիշով են ատեստավորվում, ինչ բարձր դրույքաչափերով աշխատող ուսուցիչները:

ԿԳՄՍ նախարար Ժաննա Անդրեասյանը անդրադառնալով դիտարկումներին ասաց, որ պարտադիր պահանջ է, որ թեստերի բովանդակությունը համապատասխանի դասավանդվող նյութին։ «Երբեմն խնդիրը այն է, որ ուսուցիչը ծանոթ չի լինում առարկայի երկու տարբեր դասագրքերի ողջ բովանդակությանը: Կա բողոքարկման մեխանիզմ, և եթե ուսուցիչը համաձայն չէ թեստի նյութի հետ, կարող է բողոքարկել»:

Ինչ վերաբերում է ժամանակին՝ նախարարն ասաց, որ տրվում է 180 րոպե, բայց եթե ուսուցչին չի բավարարում՝ տրվում է լրացուցիչ ժամանակ:

«Թեմային առնչվող խնդիր է թղթային տարբերակով ատեստավորումը, քանի որ ժամանակ է պահանջվում պատասխանները ձևաթղթի վրա անցկացնելու համար: Այս տարի խնդիրը կլուծվի, ատեստավորումը կլինի էլեկտրոնային տարբերակով: Այս տարվանից կամավոր ատեստավորումն արդեն պլանավորում ենք իրականացնել էլեկտրոնային եղանակով, և սա նաև լրացուցիչ ժամանակ կտա մեր ուսուցիչներին»։
Անդրադառնալով ցածր և բարձր գործակցով վճարվող ուսուցիչների ատեստավորման կարգին՝ Անդրեասյանն ասաց, որ դա սկզբունքային հարց է, քանի որ կարևորը աշակերտն է ու նշանակություն չունի, թե որ դպրոցում է սովորում և ուսուցիչը քանի աշակերտի համար է դպրոց գալիս:

«Կարծում եմ՝ մեր ուսուցիչները պետք է փոխեն իրենց դիտանկյունը, և հիշեն, որ խոսում են երեխայի կրթության մասին»։