Բագրատ արքեպիսկոպոսը պետք է դառնա ոչ թե քաղաքական լիդեր, այլ ստանձնի արբիտրի դերը, որի առկայության դեպքում որևէ ղեկավար չի դառնա այն հրեշը, որ դարձավ Փաշինյանը․ Պողոսյան

Այժմ քաղաքական դերակատարների հարցը այնքան ակտուալ չէ, որքան շարժման առաջնորդի հարցը, քանի որ հասարակության ներքին տրամադրությունները հակված են առաջնորդի փնտրտուքի։ Հիմա, կարծես, հորիզոնում հայտնվել է առաջնորդ, ում նկատմամբ կա վստահություն, ում կերպարը ընկալելի է հասարակության ընդդիմադիր շրջանակների համար և ով կարողացել է իր կերպարով համախմբել բազմահազար մարդկանց;

Այս մասին ասել է  քաղաքագետ Արա Պողոսյանը՝ ընդգծելով, որ ի շնորհիվ Սրբազանի կերպարի՝ 2018 թ-ից հետո, մենք գործ ունենք ամենամասշտաբային ակցիաների հետ։

«Սա մտահոգություններ է առաջացրել նաև Ադրբեջանում, և այդ մտահոգությունները պատահական չեն», - նշել է նա։

Քաղաքագետի դիտարկմամբ` Սրբազանի շուրջ համախմբումը բավական պարզ պատասխան ունի, հերոսի և հակահերոսի կերպարները առանձնացել են հասարակության համար։

«Կա հստակ հակահերոսի կորպար, և այլևս կա նաև հերոսի կերպար, մի բան, որ 2018 թ-ից հետո, որևէ ակցիաների ժամանակ ընդգծված չի եղել։ Մենք երբևէ այդ հակադրությունը չենք տեսել, որովհետև ընդգծված հերոսի կերպար չի եղել հրապարակում»։

Ինչ վերաբերում է Սրբազանի քաղաքական կերպար դառնալուն՝ Պողոսյանն ասաց, որ Սրբազանը պետք է լինի ոչ թե քաղաքական ապագա լիդեր, այլ` ստանձնի արբիտրի դերը, որը իրապես կդառնա ժողովրդի և իշխանության միջև արբիտր և կձեւավորի հասարակության մեջ հակակշիռի ինստիտուտը։

«Այս ինստիտուտը ֆորմալ առումով գոյություն չունի, բայց ոչ ֆորմալ առումով գոյություն ունի։ Եթե այս ինստիտուտը կայանա՝ դրանից հետո, թե ով կլինի քաղաքական դերակատարը՝ վարչապետ, նախագահ, թե նախարար, այլևս այնքան կարևոր չի լինի, քանի որ պետության փիլիսոփայության մեջ փոփոխություն պետք է տեղի ունենա, ինչի մասին խոսում է Սրբազանը։ Քաղաքական կյանքում պետք է տեղի ունենա փոփոխություն, որի պարագայում Սրբազանի կերպարը որպես արբիտրի՝ կարող է խթան դառնալ, որ քաղաքական կյանքում ևս տեղի ունենան դրական զարգացումներ՝ թե գաղափարաբանության, թե փիլիսոփայության տեսանկյունից; Նաև կարող է խթան լինել, որ նոր դերակատարներ առաջ գան։ Նախկին քաղաքական դաշտի այլասերման արդյունքում պարզապես բավարար միջավայր չկար, որպեսզի էվոլյուցիոն ճանապարհով նոր լիդերներ զարգանային և առաջ գային հրապարակում։ Սրբազանը կարող է լինել այն կերպարը, որը միջավայր կարող է ստեղծել լիդերության նոր հավակնորդների համար», - նշել է Ա.Պողոսյանը։

Նա նաև ընդգծեց, որ անցումային շրջանում, եթե այս սցերնարով շարունակվի՝ այլևս կարևոր չի լինի թե ով կլինի երկրի հաջորդ ղեկավարը, որովհետև նա այլևս հնարավորություն չի ունենա դառնալ այն հրեշը, որը դարձավ Նիկոլ Փաշինյնաը՝ իրեն երևակայելով այն լիդերը, ում դեմ ոչ ոք չի կարող կանգնել»։