Մարմնամարզուհի Էլվիրա Կրասնոբաևան հեռանում է Բուլղարիայից և հանդես կգա Հայաստանի դրոշի ներքո

Գեղարվեստական մարմնամարզության Եվրոպայի չեմպիոն, ինչպես նաև երիտասարդների շրջանում աշխարհի չեմպիոն Էլվիրա Կրասնոբաևան, ով ներկայացնում էր Բուլղարիան, այժմ որոշել է  ներկայացնել Հայաստանը միջազգային ասպարեզում ։ Հայտնում է euromedia24.com-ը:

Մարմնամարզուհու հայրը՝ Ռոման Պոլևը, ասել է, որ որոշումը պայմանավորված է ընտանեկան հանգամանքներով։ Երկրպագուներին ուղղված իր ուղերձում նա ընդգծել է, որ այս որոշումը կապված չէ մարմնամարզության կարիերայի հետ։ Նրա խոսքով՝ ընտանիքն ունի առողջական լուրջ խնդիրներ, որոնք չեն քննարկվում հանրային հարթությունում։ Նա խնդրել է խիստ չդատել իրենց ընտրությունը։

Բուլղարիայի մարմնամարզության ֆեդերացիան նշել է անցումային մի քանի պահանջներ, այդ թվում՝ փոխհատուցում պայմանագրի վաղաժամկետ խզման համար, ինչպես նաև Բուլղարիայի հավաքականի համար ստեղծված երաժշտական ​​թրեքների օգտագործման արգելք: Ֆեդերացիայի նախագահը հիասթափություն է հայտնել Կրասնոբաևայի որոշումից։ Նրա խոսքով՝ ինքն իրեն խաբված է զգում, քանի որ աջակցել է մարմնամարզուհուն և չէր սպասում նման արմատական ​​քայլի։