Փաշինյանն ու Արարատ Միրզոյանը էյֆորիայի մեջ են Ալիևի հետ հանդիպումից․ «Հրապարակ»

«Հրապարակ» օրաթերթը գրում է․ Կազանում ԲՐԻԿՍ-ի գագաթնաժողովից հետո Երեւան վերադառնալուն պես Նիկոլ Փաշինյանը եւ կառավարության որոշ անդամներ ուրբաթ երեկոյան շտապել են խորհրդարան՝ «գլխապտույտ» հաջողությունների մասին տպավորություններով կիսվելու թիմի հետ։ ՔՊ-ական պատգամավորներից ոմանք մեզ հետ մասնավոր զրույցում այդպես էին բնորոշում Նիկոլ Փաշինյանի եւ Արարատ Միրզոյանի  պահվածքը։ «Այնքան խանդավառված էին, այնքան տպավորված, կարելի է կարծել, որ սաղ հարցերը տեղն էին գցել, մեր կորուստները` հետ բերել»,- զարմացած պատմեց մեր աղբյուրը՝ շարունակելով, որ Ալիեւն անգամ թղթի վրա խոստացածն է դրժում, ուր մնաց թե բանավոր պայմանավորվածությունները հարգի, եթե անգամ այդպիսիք եղել են, եւ դա մեր օգտին է։

Նիկոլ Փաշինյանը ոգեւորված ներկայացրել է, որ վերջապես հաջողվել է անցնել «տետ ա տետ» ֆորմատին, չնայած որ թե՛ ռուսական կողմը, թե՛ Արեւմուտքն ամեն ինչ անում էին, որ միջնորդություն ստանձնեին։ Մինչդեռ երկկողմ  ֆորմատը, ըստ Փաշինյանի, այլեւս հնարավորություն չի տա որեւէ երրորդ կողմի` իր շահերից ելնելով, տորպեդահարել բանակցությունները։ Կարելի է կարծել, որ տետ ա տետ հանդիպումների ժամանակ ինքը կարողանում է որեւէ բան անցկացնել եւ Հայաստանի շահերն առաջ տանել:

Փաշինյանն ասել է, որ Ալիեւի հետ մի շարք հարցերի շուրջ կարեւոր քննարկումներ է ունեցել, անդրադարձել են կոմունիկացիաների ապաշրջափակմանը, իսկ ավելի կոնկրետ՝ բեռնափոխադրումների վերականգնմանը, ինչն ամենից շատ է ոգեւորել թե՛ Փաշինյանին, թե՛ Արարատ Միրզոյանին, եւ նրանք ՔՊ-ականներին վստահեցրել են՝ եթե դա տեղի ունենա, Հայաստանը մոտ ապագայում կծաղկի տնտեսապես, ու մարդիկ գոհ ու երջանիկ կլինեն։ Ասել են, թե նախնական պայմանավորվածություն է ձեռք բերվել, որ սկսեն գործարկել բեռնափոխադրումները՝ Երասխ-Ջուլֆա-Օրդուբադ-Մեղրի-Հորադիզ երկաթգծով։ Ու թեեւ պարզ է, որ այդ ուղին բացառապես թուրք-ադրբեջանական շահերից է բխում, բայց վարչապետ-ԱԳ նախարար զույգն այդ փաստից էյֆորիկ տրամադրության մեջ է եղել:

Փաշինյանն ասել է, որ Ալիեւի հետ 1.5 ժամանոց բանակցությունների ընթացքում քննարկել են խաղաղության պայմանագրի շուրջ աշխատանքը: Նա չի թաքցրել, որ այս հարցում առաջընթաց չկա, Ալիեւը պնդում է՝ կստորագրենք, երբ բոլոր չհամաձայնեցված դրույթները համաձայնեցվեն, ընդ որում, ըստ մեր աղբյուրի, ՔՊ-ում խոսակցություններ կան, որ չհամաձայնեցված դրույթներից մեկը վերաբերում է Հայաստանի ապառազմականացման պահանջին, այսինքն` բանակի ոչնչացմանը։ Փաշինյանը չի թաքցրել, որ իր համար ակնհայտ է, որ մոտ ապագայում խաղաղության պայմանագիրը դժվար թե ստորագրվի։ 

Պատմել է, որ քննարկել են սահմանազատումը շարունակելու հարցը, բայց չի ասել, թե հաջորդը որ հատվածն է «սահմանազատվելու», միայն, որպես մեծագույն ձեռքբերում, գլուխ է գովել, թե ինչ հաջողության է հասել: Խոսքն այն մասին է, որ երբ հիշեցրել են, որ Ադրբեջանում կանոնակարգը նույն ընթացակարգերով չի անցնում, մինչդեռ Հայաստանում ԱԺ-ն արդեն վավերացրել է, Ալիեւն ասել է` փոխվարչապետը ստորագրել է, հերիք չէ՞, ինչին Փաշինյանը հակադարձել է, որ իր` Ալիեւի ստորագրությունն է հարկավոր, եւ բանակցություններից շատ չանցած հայտարարվել է, որ սահմանազատման կանոնակարգը ստորագրել է նաեւ Ալիեւը։

Բաքվում նոյեմբերի կեսերին սպասվող COP-29 միջոցառմանը ՀՀ պաշտոնյաների մասնակցությանն էլ է անդրադարձ եղել: Արտգործնախարարի եւ Փաշինյանի պատմելով` իրենք Ալիեւին ասել են, որ պետք է Ադրբեջանից քայլ արվի՝ գերիների հանձնման կամ խաղաղության պայմանագիրը չհամաձայնեցված կետերով ստորագրելու տեսքով, որ ՀՀ պաշտոնյաները համաձայնեն ընդունել Բաքու մեկնելու հրավերը: Սակայն պայմանագրի մասով Ալիեւն անդրդվելի է մնացել, իսկ գերիների հետ կապված պատասխանել է, որ կմտածի։ Ի դեպ, խոսքը գնացել է միայն 20 թվի պատերազմից հետո գերեվարված հայաստանցի զինվորների մասին:
Հայաստանի եւ Ադրբեջանի ղեկավարների հանդիպումը, ինչպես Փաշինյանն է նշել, կայացել է գագաթնաժողովի դահլիճի կողքի սենյակում։