Խորհրդային Ադրբեջանում ապրել է ավելի քան 450.000 հայ, ՀՀ իշխանությունն ինչո՞ւ չի խոսում այս մասին. Դավիթ Շահնազարյան

Ադրբեջանի նախագահ Իլհամ Ալիևը հայտարարել է, որ շուրջ 300.000 ադրբեջանցի պաշտոնապես դիմել է Հայաստանի ղեկավարությանը, որպեսզի իրենց վերադարձի, վերաինտեգրման համար պայմաններ ստեղծվեն։

Ըստ նրա, խոսքը 1980-1990-ականներին Հայաստանից հեռացած ադրբեջանցիների մասին է:

«Նրանք վերադառնալու իրավունք ունեն: Հայաստանի ղեկավարությունից դեռ պատասխան չենք ստացել, թե ինչպես են տեսնում ադրբեջանցիների՝ «իրենց պատմական հողեր» վերադառնալու գործընթացը»,- ասել է Ալիևը։

Օրերս ԱԺ խմբակցությունների ճեպազրույցների ժամանակ «Քաղաքացիական պայմանագիր» խմբակցության քարտուղար Արթուր Հովհաննիսյանը նախ չպատասխանեց հարցին՝ արդյո՞ք հայ-ադրբեջանական բանակցություններում ադրբեջանցիների վերադարձի մասին հարց նախատեսված է, իսկ հետո ասաց՝ ո՛չ կարող է հերքել, ո՛չ հաստատել, քանի որ ՔՊ-ի օրակարգում խաղաղ գոյակցության հարցն է։

«Միասնական Վարդենիս» դաշինքի անդամ Դավիթ Շահնազարյանի խոսքով՝ եթե հայկական կողմը բարձրացներ Ադրբեջանից հայ փախստականների հարցը, որոնք շուրջ 450.000 են, և բռնի տեղահանված արցախահայերի՝ Արցախ վերադարձի հարցը, ապա Ադրբեջանն իր անհեթեթ պահանջն առաջ չէր քաշի։

Ըստ Դավիթ Շահնազարյանի, Խորհրդային Միության տարիներին՝ ինչպես Վարդենիսում, այնպես էլ՝ ՀՀ որոշ տարածքներում ադրբեջանցիները եկել են անասնապահության նպատակով, հետո արդեն անցել են նստակյաց կյանքի ու սկսել տարածքային պահանջներ ներկայացնել Հայաստանին։

«Ադրբեջանի կողմից ներկայացվող այս պահանջի հեռանկարները բնականաբար խոստումնալից չեն լինելու Հայաստանի համար։ Եթե այդպիսի բան թույլ տվեցին, ապա այդ դեպքում չեմ կարծում, թե Հայաստանին կհաջողվի պահպանել իր անկախ գոյությունը, և ավելի շուտ կգնանք վիլայեթացման։

Եթե խոսում են փախստականների վերադարձի մասին և հատկապես թիրախավորում են Վարդենիսի տարածաշրջանը, ապա չպետք է մոռանանք, որ Խորհրդային Ադրբեջանում ապրել է ավելի քան 450.000 հայ, և որևէ մեկը հայկական կողմից այս պահանջն առաջ չի քաշում։ Եթե մենք լավ դիվանագետներ ունենայինք, իսկ ես կարծում եմ, որ ունենք, բայց չգիտես՝ ինչու, այս հարցը չեն բարձրացնում։ Չմոռանանք, որ ժամանակին Խորհրդային Հայաստանը փոխհատուցում է տվել այն մարդկանց, ովքեր Հայաստանից տեղափոխվել են Ադրբեջան։ Բայց 450.000-ից ավելի հայեր, որոնք ջարդերի հետևանքով ուղղակի Ադրբեջանից գաղթեցվել են Հայաստան ու այլ երկրներ, նրանց որևէ փոխհատուցում այդպես էլ չի տրվել»,- 168.am-ի հետ զրույցում նշեց Դավիթ Շահնազարյանը։

Նա հիշեցրեց՝ մեկ տարի առաջ Ադրբեջանի ռազմական գործողությունների հետևանքով 120.000-ից ավելի արցախահայեր ենթարկվեցին էթնիկ զտման ու բռնի տեղահանության, այսօր ՀՀ իշխանությունը նրանց իրավունքների մասին առհասարակ չի խոսում։ Հետևաբար, եթե հայկական կողմից չեն ներկայացվում իր սեփական քաղաքացիների ու երկրի շահերը՝ հակառակորդն այդ ամենը շատ սահուն կերպով օգտագործում է։

Մանրամասները՝ սկզբնաղբյուր կայքում։